"അത് മാനേജരും സ്റ്റാഫും നോക്കേണ്ട കാര്യം"; ബ്രൂണോയുടെ പൊട്ടിത്തെറി, കാരിക്കിന്റെ കസേര ഇളകുന്നു

മാഞ്ചസ്റ്റർ: ചാമ്പ്യൻസ് ലീഗിൽ കോമോയോട് ഏറ്റ നാണംകെട്ട തോൽവിക്ക് പിന്നാലെ മാഞ്ചസ്റ്റർ യുണൈറ്റഡിൽ പോര് ഡ്രസ്സിങ് റൂമിൽ നിന്ന് പുറത്തേക്ക്. മത്സരശേഷം ടിഎൻടി സ്പോർട്സിനോട് സംസാരിക്കവെ നായകൻ ബ്രൂണോ ഫെർണാണ്ടസ് പരിശീലകന്റെ തന്ത്രത്തെ പരസ്യമായി ചോദ്യം ചെയ്തു. "മാൻ ടു മാൻ പ്രസ് ചെയ്യേണ്ടതില്ലെന്നത് സ്റ്റാഫിന്റെ തീരുമാനമായിരുന്നു," ബ്രൂണോ പറഞ്ഞു. തന്ത്രം പിഴച്ചോ എന്ന ചോദ്യത്തിന് "അത് മാനേജരും സ്റ്റാഫും നോക്കേണ്ട കാര്യമാണ്, എന്റേതല്ല" എന്നായിരുന്നു മറുപടി. സമ്മർദ്ദത്തിൽ പോലും ധൈര്യം കാണിക്കണമെന്നും ഉയർന്ന് പ്രസ് ചെയ്ത് റിസ്ക് എടുക്കണമെന്നും പോർച്ചുഗീസ് താരം കൂട്ടിച്ചേർത്തു.

കളിക്കാരെ പ്രതിസ്ഥാനത്ത് നിർത്തിയാണ് മൈക്കൽ കാരിക്കിന്റെ മറുപടി. "എനിക്ക് വലിയ ദേഷ്യമുണ്ട്. ഇങ്ങനെ കളിക്കുന്നത് അംഗീകരിക്കാനാവില്ല. ഏത് തന്ത്രം കളിച്ചാലും തിരിച്ചോടി പ്രതിരോധിക്കാതെ ജയിക്കാനാവില്ല," കാരിക്ക് പറഞ്ഞു. ഇഷ്ടമുള്ളപ്പോൾ മാത്രം മികച്ച കളി കാഴ്ചവെക്കാനാവില്ലെന്നും അദ്ദേഹം തുറന്നുപറഞ്ഞു. കോമോയിലെത്തിയ ആരാധകരോട് കാരിക്ക് മാപ്പും പറഞ്ഞു. നായകനും പരിശീലകനും തമ്മിലുള്ള ഈ പരസ്യ ഭിന്നത ടീമിലെ അസ്വസ്ഥതയുടെ ആഴം വെളിവാക്കുന്നു. നേരത്തേ, ട്രാൻസ്ഫർ വിപണിയിലെ നിഷ്ക്രിയതയെച്ചൊല്ലി ലിസാൻഡ്രോ മാർടിനസ് ക്ലബ് നേതൃത്വത്തെയും ടെക്നിക്കൽ ഡയറക്ടർ ജേസൺ വിൽകോക്സിനെയും വിമർശിച്ചിരുന്നു.

ഇതിനിടെയാണ് കാരിക്കിന് പകരക്കാരനെ തേടി യുണൈറ്റഡ് നീക്കം തുടങ്ങിയതായുള്ള റിപ്പോർട്ടുകൾ പുറത്തുവരുന്നത്. ജർമൻ പരിശീലകൻ ജൂലിയൻ നാഗൽസ്മാൻ ചുമതലയേൽക്കാൻ തയ്യാറാണെന്ന് ദി ടെലിഗ്രാഫും അദ്ദേഹത്തെ ക്ലബ് സമീപിച്ചുകഴിഞ്ഞുവെന്ന് ടാക്ക്സ്പോർട്ടും റിപ്പോർട്ട് ചെയ്തു. അന്റോണിയോ കോണ്ടെ, ന്യൂകാസിൽ പരിശീലകൻ എഡ്ഡി ഹൗ, ബ്രൈട്ടൺ പരിശീലകൻ ഫാബിയൻ ഹ്യൂർസലർ എന്നിവരുടെ പേരുകളും സാധ്യതാ പട്ടികയിലുണ്ട്. വാതുവെപ്പുകാരുടെ പട്ടികയിൽ ഹൗവാണ് മുന്നിൽ. എന്നാൽ കാരിക്കിനെ പുറത്താക്കുമെന്ന തരത്തിലുള്ള ഔദ്യോഗിക പ്രസ്താവനയൊന്നും ക്ലബ് നടത്തിയിട്ടില്ല. ക്ലബിനുള്ളിൽ ചിലർ ഇപ്പോഴും കാരിക്കിനൊപ്പമുണ്ടെന്നും റിപ്പോർട്ടുകൾ പറയുന്നു.

എല്ലാ ടൂർണമെന്റുകളിലുമായി തുടർച്ചയായ ഏഴു കളികളിൽ ജയമില്ലാതെയാണ് യുണൈറ്റഡ് നീങ്ങുന്നത്. ഞായറാഴ്ച സ്വന്തം മൈതാനത്ത് ബോൺമത്തിനെതിരായ പ്രീമിയർ ലീഗ് മത്സരമാണ് അടുത്തത്. അതിനു മുമ്പ് തീരുമാനമുണ്ടായില്ലെങ്കിൽ കാരിക്കിന്റെ ഭാവി ആ കളിയെ ആശ്രയിച്ചിരിക്കുമെന്നാണ് ഇംഗ്ലീഷ് മാധ്യമങ്ങളുടെ വിലയിരുത്തൽ.