നടപടിയും എടുത്തു, താരത്തെ നോവിച്ചുമില്ല; റൊണാൾഡോയ്ക്ക് 255 യൂറോ പിഴ
30 ദിവസത്തെ സസ്പെൻഷന്റെ ഭൂരിഭാഗവും വിധി വരും മുമ്പേ കഴിഞ്ഞു. നവംബറിലെ മത്സരങ്ങൾക്ക് റൊണാൾഡോയ്ക്ക് തടസ്സമില്ല
ലിസ്ബൺ: നടപടിയെടുക്കണം, എന്നാൽ താരത്തിന് നോവരുത്. ക്യാപ്റ്റൻ ക്രിസ്റ്റ്യാനോ റൊണാൾഡോയുടെ കാര്യത്തിൽ പോർച്ചുഗീസ് ഫുട്ബോൾ ഫെഡറേഷൻ (എഫ്പിഎഫ്) ഇത് രണ്ടും ഒരുമിച്ച് സാധിച്ചു. ദേശീയ ടീമിന്റെ ക്യാമ്പ് വിട്ടുപോയതിന് 30 ദിവസത്തെ സസ്പെൻഷനും 255 യൂറോ പിഴയുമാണ് ശിക്ഷ. സൗദി ക്ലബ്ബ് അൽ നസ്റിൽ നിന്ന് ദിവസവും കോടികൾ പ്രതിഫലം വാങ്ങുന്ന താരത്തിന് ഒരു മിനിറ്റ് തികയും മുമ്പ് സമ്പാദിക്കാവുന്ന തുക. സസ്പെൻഷനാകട്ടെ മുൻകാല പ്രാബല്യത്തോടെയാണ്. വിധി വന്നപ്പോഴേക്കും ശിക്ഷയുടെ ഭൂരിഭാഗവും കഴിഞ്ഞു. അതുകൊണ്ട് നവംബറിൽ നടക്കുന്ന പോർച്ചുഗലിന്റെ ഒരു മത്സരവും 41കാരനായ റൊണാൾഡോയ്ക്ക് നഷ്ടമാകില്ല. നവംബർ 14ന് നേഷൻസ് ലീഗിൽ ഡെൻമാർക്കിനെ വീണ്ടും നേരിടുന്ന പോർച്ചുഗൽ, മൂന്ന് ദിവസത്തിനു ശേഷം വെയിൽസിനെയും നേരിടും.
നേഷൻസ് ലീഗിൽ നോർവേക്കെതിരായ മത്സരത്തിൽ പകരക്കാരുടെ ബെഞ്ചിലിരുന്ന റൊണാൾഡോയ്ക്ക് കളത്തിലിറങ്ങാൻ അവസരം ലഭിച്ചിരുന്നില്ല. ഒക്ടോബർ ഒന്നിന് ഡെൻമാർക്കിനെതിരായ മത്സരത്തിലും ആദ്യ ഇലവനിൽ ഉണ്ടാകില്ലെന്ന് അറിഞ്ഞതോടെ, മത്സരത്തിന്റെ തലേന്ന് താരം ക്യാമ്പ് വിട്ടു. പരിശീലകൻ ജോർജ് ജീസസ് രണ്ടുതവണ വാക്ക് തെറ്റിച്ചെന്നും അത് "വിശ്വാസത്തിന്റെ സമ്പൂർണ ലംഘനം" ആണെന്നും നീണ്ട പ്രസ്താവനയിൽ റൊണാൾഡോ ആരോപിച്ചു. അതേ പ്രസ്താവനയിൽ സഹതാരങ്ങളോടും ആരാധകരോടും മാപ്പ് പറഞ്ഞ താരം, താൻ ശിക്ഷ അർഹിക്കുന്നുണ്ടെന്നും സമ്മതിച്ചു. എന്നാൽ റൊണാൾഡോയുമായി ഒരു ധാരണയും ഉണ്ടാക്കിയിരുന്നില്ലെന്നാണ് ജീസസിന്റെ നിലപാട്. അതേസമയം, റൊണാൾഡോയ്ക്കു മുന്നിൽ ടീമിന്റെ വാതിൽ അടച്ചിട്ടില്ലെന്നും അദ്ദേഹം വ്യക്തമാക്കി.
പ്രസ്താവനയിൽ റൊണാൾഡോ പ്രകടിപ്പിച്ച പശ്ചാത്താപവും ഫുട്ബോളിന് നൽകിയ സംഭാവനകളും കായികനേട്ടങ്ങളും പരിഗണിച്ചെന്ന് എഫ്പിഎഫ് അച്ചടക്ക സമിതി വ്യക്തമാക്കി. പുരസ്കാരങ്ങളും നേട്ടങ്ങളും ഉൾപ്പെടുന്ന തന്റെ കരിയർ വിവരങ്ങൾ പ്രതിരോധത്തിന്റെ ഭാഗമായി റൊണാൾഡോ സമിതിക്ക് സമർപ്പിച്ചിരുന്നു. ഒന്ന് മുതൽ ആറ് മാസം വരെ സസ്പെൻഷൻ നൽകാവുന്ന കുറ്റത്തിന് സമിതി തിരഞ്ഞെടുത്തത് ഏറ്റവും കുറഞ്ഞ ശിക്ഷ തന്നെ. പ്രശ്നം തീർന്നാൽ റൊണാൾഡോയെ ദേശീയ ടീമിൽ തിരികെ കാണാൻ "ശക്തമായ ആഗ്രഹം" ഉണ്ടെന്ന് എഫ്പിഎഫ് പ്രസിഡന്റ് പെഡ്രോ പ്രോയെൻസ പോർച്ചുഗീസ് മാധ്യമമായ റെക്കോർഡിനോട് പറഞ്ഞു.
അഞ്ച് തവണ ബാലൺ ദ് ഓർ ജേതാവായ റൊണാൾഡോ പോർച്ചുഗലിനായി 234 മത്സരങ്ങളിൽ നിന്ന് 146 ഗോളുകൾ നേടിയിട്ടുണ്ട്. പുരുഷ ഫുട്ബോളിൽ ഇവ രണ്ടും ലോക റെക്കോർഡാണ്. 2016 യൂറോ കപ്പും രണ്ട് നേഷൻസ് ലീഗ് കിരീടങ്ങളും പോർച്ചുഗൽ നേടിയപ്പോൾ ടീമിന്റെ മുൻനിരയിൽ റൊണാൾഡോ ഉണ്ടായിരുന്നു. 2022 ഡിസംബർ മുതൽ സൗദി ക്ലബ്ബ് അൽ നസ്റിന്റെ താരമാണ് റൊണാൾഡോ.
