ലോക ചാമ്പ്യന്മാർ കിവീസ് മണ്ണിൽ; ഇന്ത്യ–ന്യൂസിലൻഡ് ട്വന്റി20 പരമ്പരയ്ക്ക് നാളെ തുടക്കം

ക്രൈസ്റ്റ്ചർച്ച്: ട്വന്റി20 ലോകകപ്പ് ഫൈനലിലെ എതിരാളികള്ക്ക് വീണ്ടും കളമൊരുങ്ങുന്നു. ഇന്ത്യയുടെ ന്യൂസിലൻഡ് പര്യടനത്തിലെ അഞ്ചു മത്സര ട്വന്റി20 പരമ്പരയിലെ ആദ്യ മത്സരം വ്യാഴാഴ്ച ക്രൈസ്റ്റ്ചർച്ചിലെ ഹാഗ്ലി ഓവലിൽ നടക്കും. പ്രാദേശിക സമയം രാത്രി എട്ടിന്, ഇന്ത്യൻ സമയം ഉച്ചയ്ക്ക് 12.30ന് കളി തുടങ്ങും. ശ്രേയസ് അയ്യർ ഇന്ത്യയെയും മിച്ചൽ സാന്റ്നർ ന്യൂസിലൻഡിനെയും നയിക്കും. ലോകകപ്പ് ഫൈനലിൽ ഇന്ത്യയോട് തോറ്റ ടീമിലെ 13 താരങ്ങൾ കിവീസ് സംഘത്തിലുണ്ട്. ഈ വർഷം ജനുവരിയിൽ ഇന്ത്യയിൽ നടന്ന പരമ്പരയും ഇന്ത്യയ്ക്ക് സ്വന്തമായിരുന്നു. സ്വന്തം നാട്ടിൽ കണക്ക് തീർക്കാനാണ് കിവീസ് ഇറങ്ങുന്നത്.

മലയാളി താരം സഞ്ജു സാംസണിലാണ് കേരളത്തിന്റെ കണ്ണ്. അഭിഷേക് ശർമയ്ക്കൊപ്പം സഞ്ജു തന്നെ ഓപ്പണിങ് ഇറങ്ങുകയും വിക്കറ്റ് കീപ്പറുടെ ചുമതല വഹിക്കുകയും ചെയ്യുമെന്നാണ് സൂചന. ഓപ്പണർമാർ സ്ഥിരതയോടെ റൺസ് നേടുന്നുണ്ടെന്ന് നായകൻ ശ്രേയസ് തന്നെ വ്യക്തമാക്കിയതോടെ കൗമാര താരം വൈഭവ് സൂര്യവംശി ആദ്യ മത്സരത്തിൽ പുറത്തിരുന്നേക്കും. ഇഷാൻ കിഷൻ, തിലക് വർമ്മ, ശിവം ദുബെ, അക്സർ പട്ടേൽ എന്നിവർ ഉൾപ്പെട്ട ബാറ്റിങ് നിരയ്ക്ക് ആഴം കൂടുതലാണ്. വെസ്റ്റിൻഡീസിനെതിരായ കഴിഞ്ഞ പരമ്പര 2-2ന് സമനിലയിലായതിന്റെ ക്ഷീണം തീർക്കാനും ഇന്ത്യയ്ക്ക് ഈ പരമ്പര അവസരമാണ്.

ബൗളിങ് നിരയിലാണ് ഇന്ത്യയുടെ പ്രധാന ചോദ്യം. ജസ്പ്രീത് ബുംരയില്ലാത്ത പേസ് നിരയെ ഭുവനേശ്വർ കുമാറും അർഷ്ദീപ് സിങ്ങും നയിക്കും. മയങ്ക് യാദവ്, പ്രിൻസ് യാദവ് എന്നീ യുവ പേസർമാരും ടീമിലുണ്ട്. പേസിനെ തുണയ്ക്കുന്ന ഹാഗ്ലിയിൽ സ്പിന്നർ വരുൺ ചക്രവർത്തിയുടെ സ്ഥാനത്ത് പ്രിൻസിനെ ഇറക്കാനും സാധ്യതയുണ്ട്. ഫിൻ അലൻ, ഡെവൺ കോൺവെ, ഗ്ലെൻ ഫിലിപ്സ്, ഡാരിൽ മിച്ചൽ എന്നിവർ അണിനിരക്കുന്ന കിവീസ് ബാറ്റിങ് നിരയെ പിടിച്ചുകെട്ടാൻ ഇന്ത്യൻ ബൗളർമാർ വിയർപ്പൊഴുക്കേണ്ടിവരും. മാട്ട് ഹെൻറി, ലോക്കി ഫെർഗൂസൺ, ജേക്കബ് ഡഫി എന്നിവരടങ്ങിയ കിവീസ് പേസ് നിരയും കരുത്തുറ്റതാണ്. പരിക്കേറ്റ മാർക് ചാപ്മാനും സാക് ഫൗൾക്സും പരമ്പരയിൽ നിന്ന് പുറത്തായതോടെ ജോഷ് ക്ലാർക്സണും ബ്ലെയർ ടിക്ക്നറും സംഘത്തിൽ ഇടം നേടി.

രണ്ടാം മത്സരവും ഒക്ടോബർ 24ന് ഹാഗ്ലി ഓവലിൽ തന്നെയാണ്. തുടർന്ന് വെല്ലിങ്ടൺ (ഒക്ടോ. 27), ഓക്ലാൻഡ് (ഒക്ടോ. 30), ഹാമിൽടൺ (നവം. 1) എന്നിവിടങ്ങളിലാണ് ബാക്കി മത്സരങ്ങൾ. ട്വന്റി20 പരമ്പരയ്ക്ക് ശേഷം അഞ്ച് ഏകദിനങ്ങളും രണ്ട് ടെസ്റ്റുകളും പര്യടനത്തിലുണ്ട്. സോണി സ്പോർട്സ് നെറ്റ്വർക്കിലും സോണിലിവിലും തത്സമയം കാണാം.