ഇഡോറിൽ ഇന്ത്യക്ക് ജയം; പരമ്പരയിൽ മുന്നിലെത്തി

രണ്ടു ടീമും 200 മുകളിൽ സ്കോർ ചെയ്ത കളിയിൽ വെസ്റ്റ് ഇൻഡീസിനെ 14 റൺസിന് കീഴടക്കി ഇന്ത്യ. ആദ്യം ബാറ്റ് ചെയ്ത ഇന്ത്യ 223 റൺസ് നേടിയപ്പോൾ ചേസ് ചെയ്ത വിൻഡീസിന് 20 ഓവറിൽ ഏഴ് വിക്കറ്റ് നഷ്ടത്തിൽ 209 റൺസെടുക്കാനേ കഴിഞ്ഞുള്ളൂ. ജയത്തോടെ അഞ്ച് മത്സര പരമ്പരയിൽ ഇന്ത്യ 2–1ന് മുന്നിലെത്തി. ഓപ്പണർ അഭിഷേക് ശർമയുടെ വെടിക്കെട്ട് ബാറ്റിം​ഗാണ് ഇന്ത്യൻ ഇന്നിങ്സിന് അടിത്തറ പാകിയത്. 30 പന്തിൽ 69 റൺസെടുത്ത താരം ആറ് ഫോറും അഞ്ച് സിക്സും പറത്തി. ഇഷാൻ കിഷൻ 18 പന്തിൽ 37 റൺസുമായി മികച്ച പിന്തുണ നൽകി. ഇരുവരും ചേർന്നുള്ള കൂട്ടുകെട്ടാണ് ഇന്ത്യക്ക് തകർപ്പൻ തുടക്കം സമ്മാനിച്ചത്. സഞ്ജു സാംസൺ 3 റൺസിനും നായകൻ ശ്രേയസ് 1 റണ്ണിനും പുറത്തായി. ആദ്യ ആറോവറിൽ 87 റൺസെന്ന വമ്പൻ സ്കോറിലെത്തിയ ഇന്ത്യക്ക് പിന്നീട് അതേ വേഗം നിലനിർത്താനായില്ല. മധ്യ ഓവറുകളിൽ തുടർച്ചയായി വിക്കറ്റുകൾ നഷ്ടമായതോടെ റൺനിരക്ക് കുറഞ്ഞു. തിലക് വർമ്മ 28 റൺസെടുത്തെങ്കിലും വിചിത്രമായ റൺഔട്ടിൽ പുറത്തി. ഗുദാകേഷ് മോട്ടിയുടെ പന്തിൽ അക്സർ പട്ടേൽ ഡീപ് ബാക്ക്‌വേർഡ് സ്ക്വയർ ലെഗിലേക്ക് പന്ത് തട്ടിയിട്ടു. ഒരു റൺ പൂർത്തിയാക്കിയ അക്സറും തിലക് വർമ്മയും പന്ത് അതിർത്തി കടന്നെന്നാണ് കരുതിയത്. ഇരുവരും നടുവിൽ നിന്ന് പരസ്പരം കൈയടിച്ച് ആഘോഷിക്കാനും തുടങ്ങി. എന്നാൽ ഇതിനിടയിൽ വിന്റീസ് ഫീൽഡർമാർ തിലകിനെ റൺഔട്ടാക്കി. നിതീഷ് കുമാർ റെഡ്ഡി (21), അക്സർ പട്ടേൽ (20) എന്നിവരും സംഭാവന നൽകി. പക്ഷേ മധ്യനിരയിലെ രണ്ട് റണ്ണൗട്ടുകളും തുടർച്ചയായ വിക്കറ്റ് വീഴ്ചയും ഇന്ത്യയെ 20 ഓവറിൽ 223 റൺസിന് ഓൾഔട്ടാക്കി. മലയാളി താരം സഞ്ജു സാംസൺ ആറു പന്തിൽ മൂന്നു റൺസെടുത്ത് പുറത്തായത് നിരാശയായി. വിൻഡീസ് ബൗളർമാരിൽ ഷമാർ ജോസഫ്, ഷമാർ സ്പ്രിംഗർ, റോസ്റ്റൺ ചേസ് എന്നിവർ രണ്ടു വിക്കറ്റ് വീതം വീഴ്ത്തി. ഗുഡകേഷ് മോട്ടി ടി20യിലെ തന്റെ 50ആം വിക്കറ്റും നേടി. മറുപടി ബാറ്റിംഗിൽ രണ്ടാം ഓവറിൽ തന്നെ ക്യാപ്റ്റൻ ഷായ് ഹോപ്പിനെ (5) ബൗൾഡാക്കി അർഷ്ദീപ് സിംഗ് ഇന്ത്യക്ക് മികച്ച തുടക്കം നൽകി. റാഞ്ചിയിൽ സെഞ്ചുറി നേടി ഇന്ത്യയെ തോൽപ്പിച്ച ഹോപ്പിന്റെ വിക്കറ്റ് നിർണായകമായി. പിന്നീട് ഷിമ്രോൺ ഹെറ്റ്മെയറും (26 പന്തിൽ 43) കാമിൽ പൂരനും (27 പന്തിൽ 42) ചേർന്ന് വിൻഡീസിനെ കളിയിലേക്ക് തിരിച്ചുകൊണ്ടുവന്നു. തുടക്കത്തിൽ അഭിഷേക് കൈവിട്ട ഹെറ്റ്മെയറെ പിന്നീട് നമൻ ധീർ തന്നെ ബൗൾഡാക്കി. പൂരനെയും മടക്കി ധീർ രണ്ടു വിക്കറ്റ് നേടി. ഷെർഫേൻ റൂതർഫോർഡ് (19 പന്തിൽ 32), ഷമാർ സ്പ്രിംഗർ (11 പന്തിൽ പുറത്താകാതെ 35) എന്നിവർ അവസാന ഓവറുകളിൽ ആഞ്ഞടിച്ചെങ്കിലും ആവശ്യമായ റൺനിരക്ക് വിൻഡീസിന് മറികടക്കാനായില്ല. അർഷ്ദീപ് മൂന്നു വിക്കറ്റ് നേടിയപ്പോൾ അക്സർ പട്ടേലും നിതീഷ് കുമാർ റെഡ്ഡിയും ഓരോ വിക്കറ്റ് വീഴ്ത്തി. റാഞ്ചിയിൽ 249 റൺസ് പ്രതിരോധിക്കാനാകാതെ വിമർശനം നേരിട്ട ഇന്ത്യൻ ബൗളിംഗ് നിരയ്ക്ക് ആശ്വാസം നൽകുന്നതാണ് ഈ ജയം. പരമ്പരയിലെ നാലാം മത്സരത്തിൽ ജയിച്ചാൽ ഇന്ത്യക്ക് പരമ്പര സ്വന്തമാക്കാം.