പ്രതികയുടെ സെഞ്ച്വറി, ഷഫാലിയുടെ വെട്ടിക്കെട്ട്; സിംബാബ്വെയെ ഒൻപതു വിക്കറ്റിന് തകർത്ത് ഇന്ത്യൻ വനിതകൾ

വഡോദര: സിംബാബ്വെക്കെതിരായ ആദ്യ ഏകദിനത്തിൽ ഇന്ത്യൻ വനിതകൾക്ക് ഒൻപതു വിക്കറ്റിന്റെ ആധികാരിക ജയം. 49.5 ഓവറിൽ 197 റൺസിന് സിംബാബ്വെയെ പുറത്താക്കിയ ഇന്ത്യ, 27.1 ഓവറിൽ ഒരു വിക്കറ്റ് മാത്രം നഷ്ടപ്പെടുത്തി ലക്ഷ്യത്തിലെത്തി. 96 പന്തിൽ 15 ഫോറുകളടക്കം 100 റൺസുമായി പുറത്താകാതെ നിന്ന ഓപ്പണർ പ്രതിക റാവലാണ് കളിയിലെ താരം. ഇരു ടീമും തമ്മിലുള്ള ആദ്യ ഉഭയകക്ഷി പരമ്പരയുടെ ഭാഗമായ മൂന്നു മത്സരങ്ങളുള്ള ഏകദിന പരമ്പര ഐസിസി വനിതാ ചാമ്പ്യൻഷിപ്പിന്റെ ഭാഗമാണ്.

സിംബാബ്വെ ഇന്നിംഗ്സിൽ കളിയുടെ ഗതി നിശ്ചയിച്ചത് ഇന്ത്യൻ സ്പിന്നർ ശ്രീ ചരണിയാണ്. പത്തോവറിൽ മൂന്ന് മെയ്ഡനുകളടക്കം 23 റൺസ് മാത്രം വഴങ്ങി ചരണി നാലു വിക്കറ്റ് വീഴ്ത്തി. പേസർ ക്രാന്തി ഗൗഡ് 42 റൺസിന് മൂന്നും ദീപ്തി ശർമ 44 റൺസിന് രണ്ടും വിക്കറ്റ് നേടി. ഷഫാലി വർമയ്ക്കാണ് ശേഷിക്കുന്ന വിക്കറ്റ്. മൂന്നാം ഓവറിൽ തന്നെ ആദ്യ വിക്കറ്റ് നഷ്ടമായ സിംബാബ്വെ 18 ഓവർ തികയുമ്പോഴേക്കും നാലിന് 70 എന്ന നിലയിലായി. 92 പന്തിൽ 62 റൺസെടുത്ത ബിലവ്ഡ് ബിസയാണ് സന്ദർശകരെ മാനികമായ സ്കോറിലെത്തിച്ചത്. മിഷേൽ മവുംഗ 23 പന്തിൽ 29 റൺസെടുത്തു.

മറുപടി ബാറ്റിംഗിൽ ആദ്യ പത്ത് ഓവറിൽ തന്നെ 72 റൺസ് നേടിയ ഇന്ത്യ ഒരിക്കലും സമ്മർദ്ദത്തിലായില്ല. നായിക സ്മൃതി മന്ദാനയും (32) പ്രതികയും ചേർന്ന് ഓപ്പണിങ് വിക്കറ്റിൽ 94 റൺസ് ചേർത്തു. മന്ദാന പുറത്തായ ശേഷം എത്തിയ ഷഫാലി വർമ കളി വേഗത്തിൽ തീർത്തു. 33 പന്തിൽ അഞ്ചു ഫോറും നാലു സിക്സുമടക്കം 64 റൺസെടുത്ത ഷഫാലി പ്രതികയ്ക്കൊപ്പം 70 പന്തിൽ 106 റൺസ് അടിച്ചുകൂട്ടി. ഹർമൻപ്രീത് കൗർ, ദീപ്തി ശർമ, റിച്ച ഘോഷ് എന്നിവർക്ക് ബാറ്റെടുക്കേണ്ടിവന്നില്ല.

"ഇഷ്ടമല്ലാത്ത കുറേ ഷോട്ടുകൾ ഇന്ന് കളിച്ചു. ഒരു ബാറ്റർക്ക് ഒരിക്കലും തൃപ്തി വരില്ല. പക്ഷേ പന്ത് ഞാൻ ഉദ്ദേശിച്ചിടത്തേക്ക് തന്നെ പോയ ദിവസമായിരുന്നു ഇത്," എന്നായിരുന്നു പ്രതികയുടെ പ്രതികരണം. പരിക്കിൽ നിന്നുള്ള തിരിച്ചുവരവിനെക്കുറിച്ച് ചോദിച്ചപ്പോൾ, നമ്മുടെ കൈയിലില്ലാത്ത കാര്യത്തെക്കുറിച്ച് വിഷമിച്ചിട്ട് കാര്യമില്ലെന്നായിരുന്നു മറുപടി. ബൗളർമാർ, പ്രത്യേകിച്ച് ശ്രീ ചരണി, പുതിയ വേദിയുമായി വേഗത്തിൽ ഇണങ്ങിയെന്ന് മന്ദാന പറഞ്ഞു. കുറച്ചു ക്യാച്ചുകൾ നിലത്തിട്ടതും, 20 മുതൽ 35 വരെ ഓവറുകളിൽ ഫീൽഡിൽ തീവ്രത കുറഞ്ഞതും നായിക ചൂണ്ടിക്കാട്ടി. "ഏഴു മാസത്തോളം ടി20 മാത്രം കളിച്ച ശേഷമാണ് ഞങ്ങൾ വീണ്ടും 50 ഓവർ കളിക്കുന്നത്. ഈ മത്സരത്തിൽ നിന്ന് അത് പാഠമാക്കും," മന്ദാന കൂട്ടിച്ചേർത്തു. നേരത്തെ റായ്പൂർ വേദിയായ ടി20 പരമ്പരയിലും ഇന്ത്യ സിംബാബ്വെയെ നേരിട്ടിരുന്നു. രണ്ടാം ഏകദിനം ഒക്ടോബർ 25ന് വഡോദരയിൽ തന്നെ നടക്കും