ദീപ്തിയും നിക്കിയും രക്ഷകരായി; സിംബാബ്വെക്കെതിരെ ഇന്ത്യൻ വനിതകൾക്ക് ജയം

റായ്പുർ: സ്മൃതി മന്ഥാന പൂർണസമയ നായികയായ ആദ്യ മത്സരത്തിൽ സിംബാബ്‌വെയ്ക്കെതിരെ ഇന്ത്യൻ വനിതകൾക്ക് ജയം. ഷഹീദ് വീർ നാരായൺ സിങ് സ്റ്റേഡിയത്തിൽ നടന്ന ആദ്യ ടി20യിൽ നാലു വിക്കറ്റിനാണ് ഇന്ത്യ ജയിച്ചത്. ടോസ് നേടി ബൗളിങ് തിരഞ്ഞെടുത്ത ഇന്ത്യ സിംബാബ്‌വെയെ 20 ഓവറിൽ അഞ്ചിന് 114 റൺസിൽ ഒതുക്കി. മറുപടി ബാറ്റിങ്ങിൽ 15.4 ഓവറിൽ ആറു വിക്കറ്റ് നഷ്ടത്തിൽ ഇന്ത്യ 116 റൺസെടുത്തു.

ചെറിയ ലക്ഷ്യം പിന്തുടർന്ന ഇന്ത്യ ഒരു ഘട്ടത്തിൽ നാലിന് 22 എന്ന നിലയിൽ തകർന്നിരുന്നു. പവർപ്ലേയ്ക്കുള്ളിൽ തന്നെ മന്ഥാന (9), ഷഫാലി വർമ, അനുഷ്ക ശർമ, ഹർമൻപ്രീത് കൗർ (1) എന്നിവർ മടങ്ങി. എന്നാൽ അഞ്ചാം വിക്കറ്റിൽ ഒത്തുചേർന്ന ദീപ്തി ശർമയും അരങ്ങേറ്റക്കാരി നിക്കി പ്രസാദും ചേർന്ന് 82 റൺസ് കൂട്ടിച്ചേർത്ത് ടീമിനെ കരകയറ്റി. 37 പന്തിൽ എട്ടു ഫോറടക്കം 49 റൺസെടുത്ത ദീപ്തി അർധസെഞ്ച്വറിക്ക് ഒരു റൺ അകലെ പുറത്തായി. 35 പന്തിൽ 39 റൺസുമായി പുറത്താകാതെ നിന്ന നിക്കി ബൗണ്ടറിയിലൂടെ വിജയറൺ കുറിച്ചു. സിംബാബ്‌വെയ്ക്കായി നയാഷ ഗ്വാൻസുര മൂന്നു വിക്കറ്റ് വീഴ്ത്തി.

നേരത്തെ ബാറ്റ് ചെയ്ത സിംബാബ്‌വെയ്ക്കായി ഷാർനെ മേയേഴ്സ് പുറത്താകാതെ 43 റൺസും കെലിസ് എൻഡ്ലോവു 42 റൺസും നേടി. ഇന്ത്യയ്ക്കായി നന്ദനി ശർമ 11 റൺസിന് രണ്ടു വിക്കറ്റെടുത്തു. ക്രാന്തി ഗൗഡ്, അരുന്ധതി റെഡ്ഡി, ശ്രീ ചരണി എന്നിവർ ഓരോ വിക്കറ്റ് വീതം നേടി. മലയാളി താരം മിന്നു മണി ടീമിലുണ്ടെങ്കിലും ആദ്യ ഇലവനിൽ ഇടം നേടിയില്ല. പരമ്പരയിലെ രണ്ടാം മത്സരം ഞായറാഴ്ച റായ്പുരിൽ നടക്കും.