ലോകകപ്പ് വിൽപ്പന പദ്ധതിയിൽ ഫിഫ കൗൺസിലിനോട് മാപ്പ് പറഞ്ഞ് ഇൻഫന്റിനോ; രേഖകൾ പുറത്തുവിട്ടില്ലെങ്കിൽ പ്രസിഡന്റാകാൻ യോഗ്യനല്ലെന്ന് ഇംഗ്ലീഷ് എഫ്എ

'ഫിഫ ഫോർവേഡ് എന്റർപ്രൈസ്' (എഫ്എഫ്ഇ) എന്ന പേരിലുള്ള പദ്ധതി പുറത്തുവന്ന ശേഷം ആദ്യമായാണ് കൗൺസിൽ യോഗം ചേർന്നത്. ബ്രോഡ്കാസ്റ്റിംഗ്, സ്പോൺസർഷിപ്പ്, ടിക്കറ്റിംഗ് തുടങ്ങിയ ഫിഫയുടെ വാണിജ്യ പ്രവർത്തനങ്ങൾ ഒരു പുതിയ കമ്പനിക്ക് കീഴിലാക്കി അതിന്റെ ന്യൂനപക്ഷ ഓഹരി സ്വകാര്യ നിക്ഷേപകർക്ക് വിൽക്കുകയായിരുന്നു ലക്ഷ്യം. ഏകദേശം 400 കോടി ഡോളർ സമാഹരിക്കാനാകുമെന്നായിരുന്നു കണക്കുകൂട്ടൽ. ഫിഫ കൗൺസിലിനോടോ കോൺഫെഡറേഷനുകളോടോ ആലോചിക്കാതെ രഹസ്യമായി തയ്യാറാക്കിയ പദ്ധതി പുറത്തായതോടെ വ്യാപക പ്രതിഷേധമുയർന്നു. ദിവസങ്ങൾക്കുള്ളിൽ ഇൻഫന്റിനോയ്ക്ക് പദ്ധതി ഉപേക്ഷിക്കേണ്ടി വന്നു. പദ്ധതി എന്നന്നേക്കുമായി പിൻവലിച്ചെന്നും ഒരു രൂപത്തിലും തിരിച്ചുവരില്ലെന്നും ഫിഫ ഇപ്പോൾ വ്യക്തമാക്കിയിട്ടുണ്ട്.

മൂന്നര മണിക്കൂർ നീണ്ട യോഗത്തിൽ എഫ്എഫ്ഇയ്ക്കു പുറമെ, അമേരിക്കൻ സ്ട്രൈക്കർ ഫൊലാറിൻ ബലോഗണിന്റെ റെഡ് കാർഡ് വിലക്ക് മരവിപ്പിച്ച നടപടി, ഫിഫ സമാധാന പുരസ്കാരം, അംഗ അസോസിയേഷനുകൾക്കുള്ള ഫണ്ട് എന്നിവയെക്കുറിച്ചും ഇൻഫന്റിനോയ്ക്ക് ചോദ്യങ്ങൾ നേരിടേണ്ടി വന്നു. യോഗം കഴിഞ്ഞ് മണിക്കൂറുകൾക്ക് ശേഷം ഫിഫ ഇൻഫന്റിനോയുടെ വീഡിയോ സന്ദേശം പുറത്തുവിട്ടു. മാധ്യമങ്ങളോട് സംസാരിക്കാനോ ചോദ്യങ്ങൾക്ക് മറുപടി നൽകാനോ അദ്ദേഹം തയ്യാറായില്ല. "എഫ്എഫ്ഇ പദ്ധതിയുമായി ബന്ധപ്പെട്ട ആശയവിനിമയത്തിലും കൂടിയാലോചനയിലും ഞങ്ങൾക്ക് സംഭവിച്ച പിഴവുകൾക്ക് ഞാൻ ആദ്യം തന്നെ മാപ്പ് പറഞ്ഞു. എന്നാൽ അതൊരു നിർദേശം മാത്രമായിരുന്നു, അന്തിമ തീരുമാനമായിരുന്നില്ല. അംഗ അസോസിയേഷനുകളിൽ കൂടുതൽ നിക്ഷേപം നടത്താൻ ഫിഫയെ പ്രാപ്തമാക്കുകയായിരുന്നു ലക്ഷ്യം," ഇൻഫന്റിനോ വീഡിയോയിൽ പറഞ്ഞു. ചോദ്യങ്ങൾക്ക് "യഥാസമയം" രേഖാമൂലം മറുപടി നൽകുമെന്നും അദ്ദേഹം അറിയിച്ചു.

താൻ പങ്കെടുത്തതിൽ ഏറ്റവും തുറന്നതും കടുപ്പമേറിയതുമായ കൗൺസിൽ യോഗമായിരുന്നു ഇതെന്ന് ഹ്യൂവിറ്റ് പറഞ്ഞു. "ഞങ്ങൾ പ്രത്യേകമായി ആവശ്യപ്പെട്ട ഒന്നിനും മറുപടി ലഭിച്ചില്ല. എഫ്എഫ്ഇയുടെ രേഖകൾ എന്തുകൊണ്ട് നൽകുന്നില്ലെന്ന് ചോദിച്ചപ്പോൾ ചോദ്യങ്ങൾ എഴുതി നൽകാനാണ് പറഞ്ഞത്. ആ ചോദ്യങ്ങൾക്ക് ഇപ്പോൾ മറുപടി നൽകിയില്ലെങ്കിൽ അദ്ദേഹം ഫിഫ പ്രസിഡന്റാകാൻ യോഗ്യനല്ല. യോഗത്തിലും ഇക്കാര്യം പറഞ്ഞു," ഹ്യൂവിറ്റ് വ്യക്തമാക്കി. ഇൻഫന്റിനോയുടെ ക്ഷമാപണത്തിൽ "കുറച്ച് പശ്ചാത്താപം" ഉണ്ടായിരുന്നെന്ന് സമ്മതിച്ച ഹ്യൂവിറ്റ്, പദ്ധതി കൗൺസിലിന് മുന്നിൽ കൊണ്ടുവരാത്തതിനാണ് അദ്ദേഹം പ്രധാനമായും മാപ്പ് പറഞ്ഞതെന്നും കൂട്ടിച്ചേർത്തു. "അത്രയും ഖേദമുണ്ടെങ്കിൽ രേഖകൾ ഞങ്ങളുമായി പങ്കുവെക്കൂ," അവർ പറഞ്ഞു. ജർമൻ ഫുട്ബോൾ അസോസിയേഷൻ പ്രസിഡന്റ് ബേൺഡ് നോയെൻഡോർഫും സമാന നിലപാടിലാണ്. തൃപ്തികരമായ മറുപടികൾ ലഭിച്ചില്ലെന്നും ഫിഫയിൽ "സമ്പൂർണമായ പുനരാരംഭം" വേണമെന്നും അദ്ദേഹം ആവശ്യപ്പെട്ടു.

ഇൻഫന്റിനോയുടെ ഏറ്റവും കടുത്ത വിമർശകരായ യൂറോപ്യൻ ഫുട്ബോൾ സംഘടന യുവേഫ അദ്ദേഹം സ്ഥാനമൊഴിയണമെന്ന് പലതവണ ആവശ്യപ്പെട്ടിരുന്നു. ഇൻഫന്റിനോയ്ക്കെതിരെ ക്രിമിനൽ നിയമനടപടികൾക്ക് യുവേഫ തയ്യാറെടുത്തിട്ടുണ്ട്. എഫ്എഫ്ഇയുമായി ബന്ധപ്പെട്ട എല്ലാ രേഖകളും പുറത്തുവിടണമെന്ന് ആവശ്യപ്പെട്ട് അമേരിക്കയിലെ മൂന്ന് കോടതികളിൽ ഹർജിയും നൽകി. ക്രിമിനൽ നടപടികൾ ആവശ്യമുണ്ടോ എന്ന് തീരുമാനിക്കാൻ രേഖകൾ കൗൺസിലിന് മുന്നിലെത്തുന്നത് നിർണായകമാണെന്ന് ഹ്യൂവിറ്റ് പറഞ്ഞു. എന്നാൽ ഫിഫ കൗൺസിലിലെ എല്ലാവരും യൂറോപ്പിന്റെ നിലപാടിനൊപ്പമല്ല. ക്ഷമാപണത്തിനു ശേഷമുള്ള ചർച്ചയോടെ വിഷയം ഏറെക്കുറെ അവസാനിച്ചെന്നും ഭൂരിപക്ഷവും ഇൻഫന്റിനോ തുടരണമെന്ന് ആഗ്രഹിക്കുന്നുവെന്നും മൗറിറ്റാനിയൻ ഫുട്ബോൾ ഫെഡറേഷൻ പ്രസിഡന്റ് അഹമ്മദ് യഹ്യ പറഞ്ഞു. ആഫ്രിക്കൻ ഫുട്ബോൾ കോൺഫെഡറേഷനിലെ (സിഎഎഫ്) 54 അംഗങ്ങളും ഇൻഫന്റിനോയുടെ പുനർതിരഞ്ഞെടുപ്പിനെ പിന്തുണയ്ക്കുമെന്ന് സിഎഎഫ് പ്രസിഡന്റ് കഴിഞ്ഞ ആഴ്ച പ്രഖ്യാപിച്ചിരുന്നു.

അടുത്ത വർഷം മാർച്ചിൽ നടക്കുന്ന ഫിഫ കോൺഗ്രസിൽ ഇൻഫന്റിനോ വീണ്ടും പ്രസിഡന്റ് സ്ഥാനത്തേക്ക് മത്സരിക്കും. 2019ലും 2023ലും എതിരില്ലാതെയാണ് അദ്ദേഹം തിരഞ്ഞെടുക്കപ്പെട്ടത്. ഇത്തവണയും ശക്തനായ ഒരു എതിർസ്ഥാനാർഥി ഇതുവരെ രംഗത്തെത്തിയിട്ടില്ല. മുൻ ടോട്ടനം, സ്വിറ്റ്സർലൻഡ് പ്രതിരോധതാരം റാമോൺ വേഗ മത്സരിക്കുമെന്ന് പ്രഖ്യാപിച്ചിട്ടുണ്ടെങ്കിലും നാമനിർദേശത്തിന് ആവശ്യമായ അഞ്ച് അംഗ അസോസിയേഷനുകളുടെ പിന്തുണ പോലും ലഭിക്കാൻ സാധ്യതയില്ല. മുൻ ആഴ്സണൽ പരിശീലകൻ ആഴ്സൻ വെംഗർ മത്സരിക്കണമെന്നാണ് യൂറോപ്യൻ ഫുട്ബോളിലെ പ്രമുഖരുടെ ആഗ്രഹം. എന്നാൽ നിലവിൽ ഫിഫയുടെ ഗ്ലോബൽ ഫുട്ബോൾ ഡെവലപ്മെന്റ് മേധാവിയായ വെംഗർ, ജയസാധ്യത ഉറപ്പില്ലാത്ത മത്സരത്തിനായി ആ പദവി ഉപേക്ഷിക്കുമോ എന്ന് വ്യക്തമല്ല. നവംബർ 18 ആണ് നാമനിർദേശം നൽകാനുള്ള അവസാന തീയതി. "211 അസോസിയേഷനുകൾക്കും അവരുടെ ഇഷ്ടപ്രകാരം വോട്ട് ചെയ്യാൻ അവസരം വേണം. വ്യത്യസ്തമായ നയവുമായി ഒരാൾ മത്സരിക്കുന്നത് ഇൻഫന്റിനോയ്ക്കും ഫിഫയ്ക്കും നല്ലതാണ്," ഹ്യൂവിറ്റ് പറഞ്ഞു.

ലോകകപ്പിൽ ചുവപ്പ് കാർഡ് കണ്ട ബലോഗണിന് സസ്പെൻഷൻ ഒഴിവായതാണ് മറ്റൊരു "വലിയ വിഷയം" എന്ന് ഹ്യൂവിറ്റ് ചൂണ്ടിക്കാട്ടി. അമേരിക്കൻ പ്രസിഡന്റ് ഡോണൾഡ് ട്രംപ് ആവശ്യപ്പെട്ടതിനെ തുടർന്നാണ് തീരുമാനം പുനഃപരിശോധിച്ച് വിലക്ക് മരവിപ്പിച്ചത്. ഇതോടെ ബെൽജിയത്തിനെതിരായ മത്സരത്തിൽ ബലോഗണിന് കളിക്കാനായി. ചുവപ്പ് കാർഡിനുള്ള ഒരു മത്സര വിലക്ക് ഇനി അച്ചടക്ക സമിതിക്ക് മരവിപ്പിക്കാനാകാത്ത വിധം ഫിഫ അച്ചടക്ക ചട്ടം ഭേദഗതി ചെയ്യാനുള്ള നിർദേശം കൗൺസിലിൽ വന്നു. ഫിഫയുടെ നിയമ സമിതി ഇത് പരിശോധിച്ച് ഡിസംബറിൽ റിപ്പോർട്ട് നൽകും. "കളിക്കളത്തിൽ സംഭവിക്കുന്നതിനെ പുറത്തുനിന്നുള്ള ഇടപെടൽ സ്വാധീനിക്കാൻ തുടങ്ങിയാൽ അത് ഫുട്ബോളിന്റെ ഇരുണ്ട ദിനമാണ്," ഹ്യൂവിറ്റ് പറഞ്ഞു.

ട്രംപിന് നൽകിയ ഫിഫ സമാധാന പുരസ്കാരവും യോഗത്തിൽ ചർച്ചയായി. പ്രശസ്തരെയും ഉന്നതരെയും 211 അംഗ അസോസിയേഷനുകൾക്ക് മുന്നിൽ നിർത്തുന്ന ഇൻഫന്റിനോയുടെ സമീപനത്തിനെതിരെ യൂറോപ്പിന് പുറത്തുനിന്നുള്ളവരും വിമർശനമുന്നയിച്ചതായി ഹ്യൂവിറ്റ് പറഞ്ഞു. പുരസ്കാരം എങ്ങനെ രൂപപ്പെട്ടു, ആരാണ് തീരുമാനമെടുത്തത്, അത് തുടരണോ എന്നതെല്ലാം ഫിഫയുടെ സോഷ്യൽ കമ്മിറ്റി അന്വേഷിച്ച് ഡിസംബറിൽ കൗൺസിലിന് റിപ്പോർട്ട് നൽകും. "മുന്നോട്ടു പോകണമെങ്കിൽ കഴിഞ്ഞതെന്താണെന്ന് മനസ്സിലാക്കണം എന്ന് വ്യക്തമായ നിർണായക ദിനമായിരുന്നു ഇന്ന്," ഹ്യൂവിറ്റ് കൂട്ടിച്ചേർത്തു.