ഇഷാൻ കിഷന് പരിക്ക്, രണ്ടാം ടി20 നഷ്ടമാകും; വൈഭവ് സൂര്യവംശിക്ക് അവസരമൊരുങ്ങുന്നു

ന്യൂസിലാൻഡിനെതിരായ രണ്ടാം ടി20യിൽ ഇന്ത്യൻ വിക്കറ്റ് കീപ്പർ ബാറ്റർ ഇഷാൻ കിഷൻ കളിക്കില്ല. പരമ്പരയിലെ ആദ്യ മത്സരത്തിനിടെ വലതു തുടയുടെ ഉൾഭാഗത്തെ അഡക്ടർ പേശിക്ക് ഏറ്റ നേരിയ പരിക്കാണ് കാരണം. കിഷൻ പുറത്തായതോടെ കൗമാരതാരം വൈഭവ് സൂര്യവംശി അടുത്ത കളിയിൽ ഇറങ്ങാനാണ് സാധ്യതയെന്ന് റിപ്പോർട്ടുകൾ സൂചിപ്പിക്കുന്നു.

ആദ്യ ടി20യിൽ സൂര്യവംശിയെ പ്ലേയിങ് ഇലവനിൽ നിന്ന് ഒഴിവാക്കിയത് ക്രിക്കറ്റ് ലോകത്ത് വലിയ ചർച്ചയായിരുന്നു. സൂര്യവംശിയെ കളിപ്പിക്കാത്തതിനെച്ചൊല്ലിയുള്ള ബഹളമാണ് തന്നെ കൂടുതൽ ആശങ്കപ്പെടുത്തുന്നതെന്ന് ഹർഷ ഭോഗ്ലെ ക്രിക്ബസിലെ ചർച്ചയിൽ പറഞ്ഞിരുന്നു. കിഷന്റെ പരിക്കോടെ ആ ചർച്ചയ്ക്ക് അവസാനമാകാനും അന്താരാഷ്ട്ര ടി20യിൽ സൂര്യവംശിയ്ക്ക് വീണ്ടും അവസരം ലഭിക്കാനും വഴിയൊരുങ്ങുകയാണ്.

ആദ്യ മത്സരത്തിൽ സഞ്ജു സാംസന്റെ 33 പന്തിൽ 67 റൺസ് മികവിൽ നാലു വിക്കറ്റിന് ജയിച്ച ഇന്ത്യ പരമ്പരയിൽ 1-0ന് മുന്നിലാണ്. കിഷന് എത്ര മത്സരങ്ങൾ നഷ്ടമാകുമെന്ന് വ്യക്തമല്ല. പരിക്ക് ഗുരുതരമല്ലാത്തതിനാൽ പരമ്പരയിലെ അടുത്ത മത്സരങ്ങളിൽ തിരിച്ചെത്താനാകുമെന്നാണ് പ്രതീക്ഷ.