കൊച്ചിയിൽ ഗോളില്ലാ സമനില; മുംബൈയെ മറികടക്കാനാകാതെ ബ്ലാസ്റ്റേഴ്സ്

കൊച്ചി: ഐഎസ്എലിൽ കേരള ബ്ലാസ്റ്റേഴ്സ്–മുംബൈ സിറ്റി പോരാട്ടം ഗോളില്ലാ സമനിലയിൽ അവസാനിച്ചു. കലൂർ ജവഹർലാൽ നെഹ്രു സ്റ്റേഡിയത്തിൽ സ്വന്തം ആരാധകർക്ക് മുന്നിൽ, സീസണിൽ ഇതുവരെ ജയിക്കാത്ത എതിരാളികളെ മറികടക്കാൻ ആഷ്ലി വെസ്റ്റ്വുഡിന്റെ സംഘത്തിനായില്ല. സമനിലയോടെ മൂന്നു കളിയിൽ ബ്ലാസ്റ്റേഴ്സിന് നാലു പോയിന്റായി.

ഫ്രെഡി ലാല്ലവ്മാവ്മയുടെ നേതൃത്വത്തിൽ 4-2-3-1 ശൈലിയിൽ ഇറങ്ങിയ ബ്ലാസ്റ്റേഴ്സിന്റെ ആക്രമണത്തിന് മോമോ യാൻസാനെയാണ് മുന്നിൽ നിന്നത്. അഡ്രിയാൻ ലൂണയ്ക്കൊപ്പം മലയാളി താരം മുഹമ്മദ് സനാനും കോറൗ സിങ്ങും തൊട്ടുപിന്നിലുണ്ടായിരുന്നു. 37ആം മിനിറ്റിൽ ഫൗളിന് യാൻസാനെ മഞ്ഞക്കാർഡ് കണ്ടു. 39ആം മിനിറ്റിൽ മുംബൈ താരം ലൂക്കാസ് ഒട്ടോർമിൻ പരിക്കേറ്റ് മടങ്ങി; ലാൽനുന്തലുംഗ ബവ്ത്ലുംഗാണ് പകരം ഇറങ്ങിയത്. ഇടവേളയ്ക്കുശേഷം കോറൗവിനു പകരം ശ്രീകുട്ടൻ എം.എസ്. ഇറങ്ങി. ഗോളിലേക്ക് വഴി തുറക്കാനാകാതെ വന്നതോടെ 60ആം മിനിറ്റിൽ വെസ്റ്റ്വുഡ് ഇരട്ട മാറ്റം വരുത്തി. യാൻസാനെക്കു പകരം ആന്ദ്രെ ഗ്രീനും സനാനു പകരം എബിൻദാസും കളത്തിലെത്തി. മുംബൈ നിരയിലുണ്ടായിരുന്ന മലയാളി മുന്നേറ്റക്കാരൻ മുഹമ്മദ് അജ്സലിനെ 85ആം മിനിറ്റിൽ പിൻവലിച്ചു. നാലു മിനിറ്റ് നീണ്ട ഇഞ്ച്വറി ടൈമിൽ ലൂണയെ പിൻവലിച്ച് വിബിൻ മോഹനനെ ഇറക്കിയെങ്കിലും വിധി മാറിയില്ല. സെർജിയോ ലാമാസിൽ കേന്ദ്രീകരിച്ച മുംബൈ മധ്യനിര പലപ്പോഴും ബ്ലാസ്റ്റേഴ്സിനെ ബുദ്ധിമുട്ടിലാക്കി.

ഗുവാഹത്തിയിൽ നോർത്ത്ഈസ്റ്റ് യുണൈറ്റഡിനോട് 4-1ന് തോറ്റശേഷം ഗോൾ വഴങ്ങാതെ കളി പൂർത്തിയാക്കാനായത് വെസ്റ്റ്വുഡിന് ആശ്വാസമാണ്. പരിക്കേറ്റ ബികാശ് യുംനം ഇല്ലാതെയാണ് ബ്ലാസ്റ്റേഴ്സ് ഇറങ്ങിയത്. എന്നാൽ ആക്രമണത്തിൽ മൂർച്ചയില്ലാതെ പോയത് വീണ്ടും ചോദ്യങ്ങൾ ഉയർത്തുന്നു.

മനോലോ മാർക്കേസിന്റെ മുംബൈയ്ക്ക് സീസണിലെ രണ്ടാം സമനിലയാണിത്. ചർച്ചിൽ ബ്രദേഴ്സിനോട് തോറ്റും പഞ്ചാബിനെതിരെ അവസാന മിനിറ്റിൽ സമനില പിടിച്ചും എത്തിയ അവർക്ക് മൂന്നു കളിയിൽ രണ്ടു പോയിന്റ് മാത്രമാണുള്ളത്.