കളിക്കാരനായി, ഇനി ചുമതലക്കാരൻ; കീറോൺ പൊള്ളാർഡ് മുംബൈ ഇന്ത്യൻസ് ഹെഡ് കോച്ച്

മുംബൈ: വെസ്റ്റ് ഇൻഡീസ് മുൻ ഓൾറൗണ്ടർ കീറോൺ പൊള്ളാർഡിനെ മുംബൈ ഇന്ത്യൻസ് മുഖ്യ പരിശീലകനായി നിയമിച്ചു. ടീമിന്റെ ബാറ്റിങ് പരിശീലകനായിരുന്ന പൊള്ളാർഡ് 2027 ഐപിഎലിൽ ഹെഡ് കോച്ചായി ചുമതലയേൽക്കും. 2026 സീസണു ശേഷം മഹേല ജയവർധനെ ഫ്രാഞ്ചൈസിയുമായി പിരിഞ്ഞതോടെയാണ് പുതിയ നിയമനം. ശനിയാഴ്ച രാവിലെയാണ് ഫ്രാഞ്ചൈസി പ്രഖ്യാപനം നടത്തിയത്.

22ആം വയസ്സിൽ 2010-ൽ മുംബൈയിൽ എത്തിയ പൊള്ളാർഡിന് ഫ്രാഞ്ചൈസിയുമായി 16 വർഷത്തെ ബന്ധമുണ്ട്. അഞ്ചു തവണ ഐപിഎൽ ചാമ്പ്യന്മാരായ മുംബൈയുടെ സുവർണകാലത്തെ പ്രധാന താരങ്ങളിലൊരാളായിരുന്നു അദ്ദേഹം. ക്രിക്കറ്റ് ആഡിക്ടറിന്റെ കണക്കനുസരിച്ച് മുംബൈക്കായി 189 ഐപിഎൽ മത്സരങ്ങളിൽ 147.32 സ്ട്രൈക്ക് റേറ്റിൽ 3,412 റൺസും 69 വിക്കറ്റും പൊളാർഡിന്റെ പേരിലുണ്ട്. 223 സിക്സറുകളും ആ കരിയറിലുണ്ട്. കളിമതിയാക്കിയ ശേഷം ബാറ്റിങ് പരിശീലകനായി ടീമിൽ തുടർന്നു.

"മുംബൈ ഇന്ത്യൻസിന്റെ ഹെഡ് കോച്ചാകാനുള്ള അവസരം വലിയ ബഹുമതിയാണ്," പൊള്ളാർഡ് പ്രതികരിച്ചു. തന്നിൽ വിശ്വാസം അർപ്പിച്ച ടീം ഉടമകള്ക്ക് അദ്ദേഹം നന്ദി പറഞ്ഞു. മുംബൈ ജേഴ്സി അണിയുന്നതിന്റെയും പൽട്ടാൺ പടയ്ക്കായി കളിക്കുന്നതിന്റെയും അർത്ഥം പൊളിക്ക് നന്നായി അറിയാമെന്ന് ടീം സഹഉടമ നിത അംബാനി പറഞ്ഞു.