"ഞാൻ ഇപ്പോഴും പീക്കിലാണ്"; ഇന്ത്യൻ ടീമിലേക്ക് തിരിച്ചെത്തുമെന്ന ഉറപ്പിൽ മുഹമ്മദ് ഷമി

കൊൽക്കത്ത: ഇന്ത്യൻ ടീമിലേക്കുള്ള വാതിൽ തനിക്ക് മുന്നിൽ ഇപ്പോഴും തുറന്നു കിടക്കുകയാണെന്ന് മുഹമ്മദ് ഷമി. ന്യൂസിലൻഡ് പര്യടനത്തിനുള്ള ഇന്ത്യൻ ടീമിൽ നിന്ന് വീണ്ടും ഒഴിവാക്കപ്പെട്ടതിന് പിന്നാലെയാണ് വെറ്ററൻ പേസർ തിരിച്ചുവരവിനുള്ള നിശ്ചയദാർഢ്യം തുറന്നുപറഞ്ഞത്. "ഏത് തൊഴിലിലായാലും പ്രതീക്ഷ കൈവിടരുത്. എപ്പോഴും ഒരു ലക്ഷ്യം വേണം. രഞ്ജി ട്രോഫി കളിക്കുന്നതും സംസ്ഥാനത്തിന് കിരീടം നേടിക്കൊടുക്കാനല്ലേ? ഇന്ത്യൻ ടീമിലേക്ക് തിരിച്ചെത്തുക എന്ന ലക്ഷ്യം എനിക്കുണ്ടെന്ന് ഞാൻ നിഷേധിക്കുന്നില്ല," ചൊവ്വാഴ്ച മാധ്യമപ്രവർത്തകരോട് ഷമി പറഞ്ഞതായി രാജ്യാന്തര വാർത്താ ഏജൻസിയായ റോയിട്ടേഴ്സ് റിപ്പോർട്ട് ചെയ്തു.

ഫിറ്റ്നസിനെക്കുറിച്ചുള്ള സംശയങ്ങളെ ഷമി പൂർണ്ണമായും തള്ളിക്കളഞ്ഞു. കഴിഞ്ഞ ആഴ്ച സർവീസസിനെതിരായ രഞ്ജി മത്സരത്തിൽ ബംഗാൾ ടീമിൽ നിന്ന് ഒഴിവാക്കിയത് സ്പിന്നിന് അനുകൂലമായ പിച്ചായതിനാലാണെന്നും ഫിറ്റ്നസ് അതിന് കാരണമല്ലെന്നുമാണ് ഷമിയുടെ വിശദീകരണം. "ഞാൻ ഇപ്പോഴും പീക്കിലാണ്. നിങ്ങൾക്ക് തന്നെ കാണാം. ഇന്നലെയും ഇന്നും ഞാൻ പരിശീലനത്തിനിറങ്ങി," ഷമി പറഞ്ഞു. കാലിലെ പരിക്കുകൾ കാരണം കഴിഞ്ഞ കുറച്ചു വർഷങ്ങളായി ഷമിയുടെ കരിയർ തുടർച്ചയായി തടസ്സപ്പെടുകയാണ്.

മൂന്ന് ഫോർമാറ്റുകളിലുമായി 197 മത്സരങ്ങളിൽ നിന്ന് 462 അന്താരാഷ്ട്ര വിക്കറ്റുകളുള്ള ഷമി ഇന്ത്യക്കായി അവസാനം കളിച്ചത് 2025 മാർച്ചിലാണ്. ഇന്ത്യ ജേതാക്കളായ ചാമ്പ്യൻസ് ട്രോഫിയിൽ ടീമിന്റെ ഏറ്റവും കൂടുതൽ വിക്കറ്റ് നേടിയവരിൽ ഒരാളായിരുന്നു ഷമി. 2023ൽ സ്വന്തം നാട്ടിൽ നടന്ന ഏകദിന ലോകകപ്പിലും ഏറ്റവും കൂടുതൽ വിക്കറ്റ് വീഴ്ത്തിയത് ഷമിയായിരുന്നു. അടുത്ത വർഷത്തെ ഏകദിന ലോകകപ്പിൽ ഷമി ഇടം കണ്ടെത്താനുള്ള സാധ്യത കുറവാണെന്നാണ് വിലയിരുത്തൽ. എന്നാൽ അത്രത്തോളം ദൂരേക്ക് ചിന്തിക്കുന്നില്ലെന്നാണ് ഷമിയുടെ നിലപാട്. "ജീവിതത്തിൽ എന്ത് സംഭവിക്കുമെന്ന് ആർക്കും അറിയില്ല. ആര് റൺസെടുക്കുമെന്നോ ആര് വിക്കറ്റ് വീഴ്ത്തുമെന്നോ പറയാനാകില്ല," ഷമി കൂട്ടിച്ചേർത്തു.

അഞ്ച് മത്സരങ്ങളുള്ള ട്വന്റി20 പരമ്പരയോടെ വ്യാഴാഴ്ചയാണ് ഇന്ത്യയുടെ ന്യൂസിലൻഡ് പര്യടനം തുടങ്ങുന്നത്. അഞ്ച് ഏകദിനങ്ങളും രണ്ട് ടെസ്റ്റുകളും പിന്നാലെയുണ്ട്.