പരിശീലനത്തിനു പിന്നാലെ കുഴഞ്ഞുവീണു; ബയേൺ പരിശീലകൻ വിൻസന്റ് കോംപനി ആശുപത്രിയിൽ

മ്യൂണിക്: ബയേൺ മ്യൂണിക് പരിശീലകൻ വിൻസന്റ് കോംപനിയെ ആശുപത്രിയിൽ പ്രവേശിപ്പിച്ചു. വെള്ളിയാഴ്ച ക്ലബ്ബിന്റെ ആസ്ഥാനമായ സേബനർ സ്ട്രാസെയിലെ പരിശീലനത്തിന്റെ അവസാനം കുഴഞ്ഞുവീണ ബെൽജിയൻ പരിശീലകനെ ഉടൻ വൈദ്യസഹായം നൽകി ആംബുലൻസിൽ മ്യൂണിക് നഗരത്തിലെ ആശുപത്രിയിലേക്ക് മാറ്റിയതായി സ്കൈ സ്പോർട്സ് ജർമനിയും ജർമൻ പത്രം ബിൽഡും റിപ്പോർട്ട് ചെയ്തു. കോംപനിയുടെ നില തൃപ്തികരമാണെന്ന് സ്കൈ ജർമനി പിന്നീട് അറിയിച്ചു. ക്ലബ് ഇതുവരെ ഔദ്യോഗിക പ്രസ്താവന ഇറക്കിയിട്ടില്ല.

ദിവസങ്ങളായി കോംപനി അസുഖബാധിതനായിരുന്നു. കഴിഞ്ഞ ആഴ്ച പിടിപെട്ട ശക്തമായ വൈറസ് ബാധയെ തുടർന്ന് ലൈപ്സിഗിനെതിരായ 6-1 ജയത്തിനിടെയും ശേഷവും അദ്ദേഹം ഡ്രസ്സിങ് റൂമിലെ സോഫയിൽ കിടന്നതായി ബിൽഡ് റിപ്പോർട്ട് ചെയ്തിരുന്നു. തുടർന്നുള്ള തിങ്കളാഴ്ചത്തെ പരിശീലനം നഷ്ടമായി. ആഴ്സണലിനെതിരായ ചാമ്പ്യൻസ് ലീഗ് മത്സരത്തിനു മുമ്പുള്ള വാർത്താസമ്മേളനത്തിലും കോംപനി എത്തിയില്ല. സഹായക പരിശീലകൻ ആറൺ ഡാങ്ക്സാണ് അന്ന് മാധ്യമങ്ങളെ കണ്ടത്. "വിശ്രമിക്കാനും ആവശ്യമുള്ളത്ര സമയം എടുക്കാനുമാണ് ഞങ്ങൾ അദ്ദേഹത്തോട് ആവശ്യപ്പെടുന്നത്," എന്ന് ഡാങ്ക്സ് അന്ന് പറഞ്ഞിരുന്നു.

ആഴ്സണലിനെതിരായ മത്സരത്തിൽ കോംപനി ടച്ച്ലൈനിൽ തിരിച്ചെത്തി. കളി 2-2ന് സമനിലയിലായി. ശരീരം പറഞ്ഞത് കേൾക്കാതെ പോയെന്നും ശക്തമായ വൈറസ് ബാധയാണ് വിട്ടുനിൽക്കാൻ നിർബന്ധിതനാക്കിയതെന്നും മത്സരശേഷം അദ്ദേഹം പറഞ്ഞിരുന്നു. ആഴ്സണൽ മത്സരത്തിനു മുമ്പേ കാലുകളിൽ വേദനയുണ്ടായിരുന്നുവെന്നും വൈറസ് ബാധയെ തുടർന്നുള്ള ഇടുപ്പിലെ പ്രശ്നങ്ങളാണ് കാരണമെന്നും സ്കൈ ജർമനി റിപ്പോർട്ട് ചെയ്യുന്നു. ഞായറാഴ്ച ഫ്രൈബർഗിനെതിരെ അവരുടെ തട്ടകത്തിലാണ് ബയേണിന്റെ അടുത്ത ബുണ്ടസ് ലിഗ മത്സരം.