സെൽഫ് ഗോളിന് പകരം കോച്ചിന്റെ വിജയ ഗോൾ; ഐഎസ്എൽ ഉദ്ഘാടനത്തിൽ ബെംഗളൂരുവിന് ജയം

ബെംഗളൂരു: സീസണിലെ ആദ്യ മത്സരത്തിൽ തന്നെ നാടകീയത. ശ്രീ കണ്ടീരവ സ്റ്റേഡിയത്തിൽ അഞ്ച് ഗോളുകൾ പിറന്ന ഐഎസ്എൽ 2026-27 സീസണിലെ ഉദ്ഘാടന മത്സരത്തിൽ ബെംഗളൂരു എഫ്സി എസ്സി ഡൽഹിയെ 3-2ന് തോൽപ്പിച്ചു. കളി തീരാൻ ഒരു മിനിറ്റ് ബാക്കിനിൽക്കെ ഡിഫൻഡർ മെന്നോ കോച്ച് നേടിയ ഗോളാണ് കളി തീരുമാനിച്ചത്.

22ആം മിനിറ്റിൽ ബോർജ മാർട്ടിനസിലൂടെ ബെംഗളൂരു മുന്നിലെത്തി. നാലു മിനിറ്റിനുള്ളിൽ ഡൽഹി തിരിച്ചടിച്ചു. 26ആം മിനിറ്റിൽ റോഡ്രിഗീഞ്ഞോയാണ് സമനില ഗോൾ നേടിയത്. 32ആം മിനിറ്റിൽ മെന്നോ കോച്ചിന്റെ സെൽഫ് ഗോളിലൂടെ ഡൽഹി ലീഡെടുത്തു. ഡൽഹി 2-1ന് മുന്നിലായാണ് ഇടവേളയ്ക്ക് പിരിഞ്ഞത്.

രണ്ടാം പകുതിയിൽ സ്വന്തം ആരാധകർക്ക് മുന്നിൽ ബെംഗളൂരു ആക്രമണം കൂട്ടി. 75ആം മിനിറ്റിൽ ബോർജ തന്നെ സമനില ഗോൾ നേടി. സമനിലയിൽ കളി അവസാനിക്കുമെന്ന് തോന്നിയപ്പോഴാണ് 89ആം മിനിറ്റിലെ കോച്ചിന്റെ ഗോൾ. സെൽഫ് ഗോളിന് ഡച്ച് ഡിഫൻഡറുടെ മധുരപ്രതികാരം.

സ്പാനിഷ് പരിശീലകൻ പെപ് മുഞ്ഞോസിന്റെ ബെംഗളൂരുവിന് ജയത്തോടെ തുടക്കം. തോമസ് ചോർസ് പരിശീലിപ്പിക്കുന്ന എസ്സി ഡൽഹി ലീഡ് നേടിയിട്ടും അവസാന നിമിഷത്തിൽ കളി കൈവിട്ടു. ഇരുടീമും മുൻസീസണിൽ ഫെബ്രുവരിയിൽ ഇതേ വേദിയിൽ ഏറ്റുമുട്ടിയപ്പോഴും ബെംഗളൂരു 2-0ന് ജയിച്ചിരുന്നു.

ഇന്ന് രാത്രി 7.30ന് ഗോവയിൽ എഫ്സി ഗോവ ചെന്നൈയിനെ നേരിടും. കേരള ബ്ലാസ്റ്റേഴ്സ് നാളെ വൈകുന്നേരം അഞ്ചിന് ഇന്റർ കാശിക്കെതിരെ കളത്തിലിറങ്ങും.