യുണൈറ്റഡിൽ പൊട്ടിത്തെറി; നേതൃത്വത്തിനെതിരെ ആഞ്ഞടിച്ച് ലിസാൻഡ്രോ മാർട്ടിനെസ്

മാഞ്ചസ്റ്റർ: ചാമ്പ്യൻസ് ലീഗിൽ അത്‌ലറ്റിക്കോ മാഡ്രിഡിനോട് 2-0ന് തോറ്റതിനു പിന്നാലെ മാഞ്ചസ്റ്റർ യുണൈറ്റഡിലെ അസ്വസ്ഥത പരസ്യമാക്കി അർജന്റീനിയൻ ഡിഫൻഡർ ലിസാൻഡ്രോ മാർട്ടിനെസ്. ക്ലബ്ബിന്റെ ടെക്നിക്കൽ ഡയറക്ടർ ജേസൺ വിൽകോക്സിനെ ലക്ഷ്യമിട്ടാണ് ആമസോൺ പ്രൈമിന് നൽകിയ അഭിമുഖത്തിൽ അദ്ദേഹം തുറന്നടിച്ചത്. "ഞാൻ കൂടുതൽ പ്രതീക്ഷിക്കുന്നു, 100 ശതമാനവും. ഞങ്ങളുടെ ടെക്നിക്കൽ ഡയറക്ടറിൽ നിന്ന് കൂടുതൽ പ്രതീക്ഷിക്കുന്നു," അദ്ദേഹം തുറന്നുപറഞ്ഞു.

ടീമിന്റെ പ്രകടനത്തെ "വളരെ മോശം" എന്ന് വിശേഷിപ്പിച്ച ലിസാൻഡ്രോ, തനിക്ക് ഏറെ സ്വയം നിയന്ത്രിക്കേണ്ടിവരുന്നുവെന്നും പറഞ്ഞു. "ക്ലബ്ബ് ഇപ്പോൾ എവിടെയെത്തി നിൽക്കുന്നു എന്നതിന്റെ കണ്ണാടിയാണ് ഇത്." കഴിഞ്ഞ സീസണിൽ മൂന്നാം സ്ഥാനത്ത് എത്തിയ ടീമിന് കിരീടത്തിനായി പോരാടാൻ കൂടുതൽ കളിക്കാരെ എത്തിക്കണമായിരുന്നുവെന്നും, മുകളിലുള്ളവരിൽ നിന്ന് കൂടുതൽ പ്രതീക്ഷിച്ചുവെന്നും അദ്ദേഹം കൂട്ടിച്ചേർത്തു. ചാമ്പ്യൻസ് ലീഗ് നിലവാരമുള്ള സ്ക്വാഡല്ലേ യുണൈറ്റഡിന്റേത് എന്ന ചോദ്യത്തിന് "ഞാൻ കൂടുതൽ പ്രതീക്ഷിക്കുന്നു, സത്യസന്ധമായി പറഞ്ഞാൽ കൂടുതൽ നിക്ഷേപം" എന്നായിരുന്നു മറുപടി.

പരിശീലകനെ മാത്രം പഴിച്ചിട്ട് കാര്യമില്ലെന്നും അദ്ദേഹം തുറന്നടിച്ചു. "എപ്പോഴും മാനേജരെ മാറ്റിക്കൊണ്ടിരിക്കാൻ പറ്റില്ല. മറ്റു മേഖലകളുടെ കാര്യമോ?" എന്ന ചോദ്യം കാരിക്കിന്റെ സ്ഥാനത്തെച്ചൊല്ലിയുള്ള ചർച്ചകൾക്കിടെയാണ്. എന്നാൽ സഹതാരങ്ങളെയും അദ്ദേഹം വെറുതേ വിട്ടില്ല. "ഇവിടെ വന്നിട്ട് മികച്ച ഫലത്തിനായി എന്റെ ടീം ശ്രമിക്കുന്നത് കാണാതിരിക്കുന്നത് അസ്വസ്ഥതയും നിരാശയുമാണ്," അദ്ദേഹം പറഞ്ഞു. അത്‌ലറ്റിക്കോ ജയം അർഹിച്ചിരുന്നുവെന്നും ലിസാൻഡ്രോ സമ്മതിച്ചു.

ഇതേക്കുറിച്ച ചോദ്യത്തിന് കാരിക്കിന്റെ മറുപടി ഒഴിഞ്ഞുമാറലായിരുന്നു. "ഞാൻ അത് കണ്ടിട്ടില്ല. ഇത് അതിനുള്ള ശരിയായ സമയമല്ല. എല്ലാവർക്കും ക്ലബ്ബിനെക്കുറിച്ച് ചിന്തയുണ്ട്; പല തരത്തിലാണ് അത് പ്രകടിപ്പിക്കുന്നത്. ഇപ്പോൾ ഒന്നിച്ചുനിന്ന് മുന്നോട്ടുപോകേണ്ട സമയമാണ്," കാരിക്ക് ആമസോണിനോട് പറഞ്ഞു.

സഹതാരങ്ങളുടെ പ്രതികരണങ്ങളും ഡ്രസ്സിംഗ് റൂമിലെ അസ്വസ്ഥത വെളിപ്പെടുത്തുന്നതായി. പകരക്കാരനായി 25 മിനിറ്റ് കളിച്ച അമദ് ഡിയാലോ സ്നാപ്ചാറ്റ് സ്റ്റോറിയിൽ പ്രകടനത്തെ അസഭ്യപദം ചേർത്ത് "നാണകേട്" എന്ന് വിശേഷിപ്പിച്ചു. ലിസാൻഡ്രോയുടെ പരാമർശങ്ങളെക്കുറിച്ചുള്ള ചോദ്യത്തിന് "അതിനെക്കുറിച്ച് ഒന്നും പറയാനില്ല" എന്നായിരുന്നു യൂരി ടിലെമാൻസിന്റെ മറുപടി. കളിക്കാർക്ക് പരിശീലകനിലും സ്റ്റാഫിലും വിശ്വാസമുണ്ടെന്ന് ആൻഡ്രേ സാന്റോസ് പറഞ്ഞു. യാത്ര ചെയ്ത് എത്തിയ ആരാധകരോട് അദ്ദേഹം ക്ഷമ ചോദിക്കുകയും ചെയ്തു.

കഴിഞ്ഞ ജനുവരിയിൽ റൂബൻ അമോറിമിന് പകരം ചുമതലയേറ്റ കാരിക്ക് ടീമിനെ മൂന്നാം സ്ഥാനത്തേക്ക് നയിച്ചിരുന്നു. എന്നാൽ ഈ സീസണിൽ പ്രീമിയർ ലീഗിൽ ആറു കളി കഴിഞ്ഞപ്പോൾ യുണൈറ്റഡ് 13ആം സ്ഥാനത്താണ്. കാരാബവോ കപ്പിൽ ബ്രൈട്ടണോട് തോറ്റ് പുറത്തായി. എല്ലാ ടൂർണമെന്റുകളിലുമായി അഞ്ചു കളികളായി ജയമില്ല. ഞായറാഴ്ച എല്ലംഗ് റോഡിൽ ലീഡ്സിനെതിരായ മത്സരം കാരിക്കിന് നിർണായകമാകും. ലിസാൻഡ്രോയുടെ പരാമർശങ്ങളെക്കുറിച്ച് ക്ലബ്ബോ വിൽകോക്സോ ഇതുവരെ പ്രതികരിച്ചിട്ടില്ല.