ആർട്ടെറ്റ ആഴ്സനലിൽ തുടരും; കരാർ 2030 വരെ

ലണ്ടൻ: ആഴ്സനലും മൈക്കൽ ആർട്ടെറ്റയും തമ്മിലുള്ള ബന്ധം ഇനിയും നീളും. ബുധനാഴ്ചയാണ് ക്ലബ്ബ് പുതിയ കരാർ ഔദ്യോഗികമായി പ്രഖ്യാപിച്ചത്. ‘ഒന്നിച്ച് മുന്നോട്ട്’ എന്ന സന്ദേശത്തോടെയായിരുന്നു ആഴ്സനലിന്റെ പ്രഖ്യാപനം. 2024 സെപ്റ്റംബറിൽ ഒപ്പുവച്ച നിലവിലെ കരാർ ഈ സീസണിന്റെ അവസാനത്തോടെ തീരാനിരിക്കെയാണ് ക്ലബ്ബ് നേരത്തെ തന്നെ പുതുക്കിയത്.

2019 ഡിസംബറിൽ ചുമതലയേൽക്കുമ്പോൾ ആഴ്സനൽ ലീഗിൽ പത്താം സ്ഥാനത്തായിരുന്നു. അവിടെ നിന്നാണ് 44കാരനായ ആർട്ടെറ്റ ടീമിനെ പടിപടിയായി കെട്ടിപ്പടുത്തത്. കഴിഞ്ഞ സീസണിൽ പ്രീമിയർ ലീഗ് കിരീടം നേടി 22 വർഷത്തെ ഇടവേള അവസാനിപ്പിച്ചു. ചാമ്പ്യൻസ് ലീഗിൽ ഫൈനൽ വരെയെത്തി രണ്ടാം സ്ഥാനക്കാരുമായി. ക്വാർട്ടർ ഫൈനൽ, സെമി ഫൈനൽ, ഫൈനൽ എന്നിങ്ങനെ മൂന്നു വർഷം കൊണ്ട് യൂറോപ്പിലും ടീം പടി കയറി.

ഇപ്പോൾ പ്രീമിയർ ലീഗിൽ ഏറ്റവും കൂടുതൽ കാലമായി ഒരു ക്ലബ്ബിന്റെ പരിശീലകസ്ഥാനത്തുള്ളയാൾ ആർട്ടെറ്റയാണ്. ഡിസംബറിൽ അദ്ദേഹം ആഴ്സനലിൽ ഏഴു വർഷം പൂർത്തിയാക്കും. കളിക്കാരനായി കരിയറിന്റെ അവസാന അഞ്ചു വർഷം ചെലവഴിച്ചതും ഇതേ ക്ലബ്ബിലാണ്. പുതിയ കരാറോടെ പ്രീമിയർ ലീഗിൽ ഏറ്റവും ഉയർന്ന പ്രതിഫലം വാങ്ങുന്ന പരിശീലകനായി അദ്ദേഹം മാറിയെന്നാണ് റിപ്പോർട്ടുകൾ.

ക്ലബ്ബുമായി ഇതിനകം പ്രത്യേക ആത്മബന്ധം രൂപപ്പെട്ടുവെന്നും ജീവിതകാലം മുഴുവൻ ഓർക്കാവുന്ന നിമിഷങ്ങൾ ഒരുമിച്ച് സൃഷ്ടിച്ചുവെന്നും ആർട്ടെറ്റ പ്രതികരിച്ചു. ഇത് ഒരു തുടക്കം മാത്രമാണെന്നും ഭാവിയിലേക്ക് പ്രതിബദ്ധത അറിയിക്കാനാകുന്നത് അഭിമാനമാണെന്നും അദ്ദേഹം പറഞ്ഞു. ആഴ്സനലിന്റെ മൂല്യങ്ങൾ ഹൃദയത്തിൽ സൂക്ഷിക്കുന്നയാളാണ് ആർട്ടെറ്റയെന്ന് ക്ലബ്ബ് സഹ ചെയർമാന്മാരായ സ്റ്റാൻ ക്രോയെങ്കിയും ജോഷ് ക്രോയെങ്കിയും പറഞ്ഞു. അടിത്തറ ഒരുക്കുകയാണ് ഏറ്റവും പ്രയാസമെന്നും ഇനി ആധിപത്യം സ്ഥാപിക്കാനുള്ള അവസരമാണ് മുന്നിലെന്നും ജോഷ് ക്രോയെങ്കി കൂട്ടിച്ചേർത്തു.

റയൽ മാഡ്രിഡും ബാഴ്സലോണയും ആർട്ടെറ്റയെ നോട്ടമിടുന്നുവെന്ന അഭ്യൂഹങ്ങൾക്കും ഇതോടെ അവസാനമായി. ആർട്ടെറ്റയുടെ പരിശീലക സംഘത്തിന്റെ കരാറുകളും ക്ലബ്ബ് പുതുക്കുന്നുണ്ട്.

ഈ സീസണിൽ ലീഗിൽ മാഞ്ചസ്റ്റർ സിറ്റിയേക്കാൾ മൂന്നു പോയിന്റ് പിന്നിലാണ് ആഴ്സനൽ. ബ്രൈറ്റണിനോട് 3-0ന് തോറ്റതാണ് സീസണിലെ ആദ്യ തോൽവി. തുടർച്ചയായ രണ്ടാം ലീഗ് കിരീടവും ഒപ്പം യൂറോപ്യൻ കിരീടവുമാണ് ആർട്ടെറ്റയുടെ മുന്നിലുള്ള അടുത്ത ലക്ഷ്യം.