ആദ്യം തെറിക്കുന്നത് ആരുടെ കസേര? കാരിക്, ഡി സേർബി, അർബെലോവ സമ്മർദത്തിൽ

ലണ്ടൻ: ഇംഗ്ലീഷ് ഫുട്ബോളിൽ ഈ സീസണിലെ ആദ്യ പരിശീലക പുറത്താക്കൽ ആരുടേതാകും എന്ന ചർച്ച ചൂടുപിടിക്കുകയാണ്. മാഞ്ചസ്റ്റർ യുണൈറ്റഡിന്റെ മൈക്കിൾ കാരിക്, ടോട്ടൻഹാമിന്റെ റോബർട്ടോ ഡി സേർബി, ഫുൾഹാമിന്റെ അൽവാരോ അർബെലോവ എന്നിവരാണ് പട്ടികയിൽ മുന്നിൽ. ആറു കളികളിൽ നിന്നുള്ള ഫലങ്ങളാണ് മൂന്നുപേരെയും സമ്മർദത്തിലാക്കിയത്. കാരിക്: നിർണായക ഘട്ടം ഈ വർഷം തുടക്കത്തിലാണ് കാരിക് യുണൈറ്റഡിന്റെ ചുമതലയേറ്റത്. തകർന്ന സീസണിൽ ടീമിനെ മൂന്നാം സ്ഥാനത്തെത്തിച്ചതോടെ സ്ഥിരം നിയമനം ലഭിച്ചു. പക്ഷേ ഈ സീസണിൽ കാര്യങ്ങൾ തലകീഴായി. ശനിയാഴ്ച ഓൾഡ് ട്രാഫർഡിൽ പത്തുപേരായി ചുരുങ്ങിയ സ്പർസിനോടും യുണൈറ്റഡ് ലീഡ് കൈവിട്ടു. ഇഞ്ചുറി സമയത്തെ സോളങ്കിയുടെ ഗോളിൽ 1-1 സമനില. 40 വർഷത്തിനിടയിലെ ഏറ്റവും മോശം ലീഗ് തുടക്കമാണ് യുണൈറ്റഡിന്റേത്. "കളിയിലേക്ക് കയറാൻ ഒരു വഴിയും കണ്ടെത്താനായില്ല," എന്ന് കാരിക് തന്നെ സമ്മതിച്ചു. ആരാധകർ പദ്ധതിക്കൊപ്പം നിൽകുമെങ്കിലും അന്തരീക്ഷം വേഗത്തിൽ മാറുകയാണെന്ന് ഗാരി നെവിൽ നിരീക്ഷിച്ചു. ചാമ്പ്യൻസ് ലീഗിൽ അത്ലറ്റിക്കോ മാഡ്രിഡിനെതിരെയും ലീഗിൽ ലീഡ്സിനെതിരെയും എവേ മത്സരങ്ങളാണ് യുണൈറ്റഡിന് ഇനി. ഡി സേർബി: മൂന്നാം സീസണിലും താഴെ? കഴിഞ്ഞ രണ്ടു സീസണിലും 17ആം സ്ഥാനത്താണ് ടോട്ടൻഹാം ഫിനിഷ് ചെയ്തത്. മാറ്റത്തിനായി എത്തിയ ഡി സേർബിക്കു കീഴിലും ആറു കളികളിൽ ഒരു ജയം പോലുമില്ല. ഓൾഡ് ട്രാഫർഡിലെ സമനിലയോടെ അവസാന സ്ഥാനത്തുനിന്ന് 18ആം സ്ഥാനത്തേക്ക് കയറിയത് മാത്രമാണ് ആശ്വാസം. യുണൈറ്റഡിനെതിരെ ആദ്യ അരമണിക്കൂർ സ്പർസ് കളി നിയന്ത്രിച്ചതും പത്തുപേരായിട്ടും തിരിച്ചടിച്ചതും നല്ല സൂചനയാണ്. "ഫുട്ബോൾ എന്നാൽ സ്വഭാവശക്തിയാണ്," എന്നാണ് കളിക്കു ശേഷം ഡി സേർബി പറഞ്ഞത്. പക്ഷേ പ്രകടനം ഫലമായി മാറിയില്ലെങ്കിൽ സ്പർസ് വീണ്ടും പരിശീലകനെ മാറ്റുമെന്ന മുന്നറിയിപ്പുകൾ ഇംഗ്ലീഷ് മാധ്യമങ്ങളിലുണ്ട്. അർബെലോവ: പട്ടികയുടെ അടിത്തട്ടിൽ മൂന്നുപേരിൽ ഏറ്റവും കുറഞ്ഞ പരിചയസമ്പത്തുള്ളത് 43കാരനായ അർബെലോവയ്ക്കാണ്. മാർക്കോ സിൽവ പോയതിനു ശേഷം ഫുൾഹാമിലെത്തിയ മുൻ ലിവർപൂൾ, റയൽ മാഡ്രിഡ് താരത്തിന്റെ ആദ്യ പ്രീമിയർ ലീഗ് ദൗത്യമാണിത്. സാബി അലോൺസോ പുറത്തായശേഷം കഴിഞ്ഞ സീസണിൽ കുറച്ചുകാലം റയൽ മാഡ്രിഡിനെ പരിശീലിപ്പിച്ചതാണ് അദ്ദേഹത്തിന്റെ പ്രധാന അനുഭവം. ശനിയാഴ്ച ഇപ്സ്വിച്ചിനോട് അവസാന മിനിറ്റുകളിൽ രണ്ടു ഗോൾ വഴങ്ങി 2-1ന് തോറ്റതോടെ ഫുൾഹാം പട്ടികയിൽ ഏറ്റവും താഴെയായി. ആറു കളികളിൽ ജയമില്ല, നാലു തോൽവി. സണ്ടർലാൻഡ്, പാലസ്, യുണൈറ്റഡ്, ഇപ്സ്വിച് എന്നിവർക്കെതിരെ 75ആം മിനിറ്റിനു ശേഷം ഗോൾ വഴങ്ങിയത് ടീമിന്റെ ദൗർബല്യം വ്യക്തമാക്കുന്നു. വിമർശകർക്ക് അർബെലോവ മറുപടി നൽകി: "എന്റെ സ്ഥാനത്തെക്കുറിച്ച് ഞാൻ ഒരിക്കലും ആശങ്കപ്പെടാറില്ല. എനിക്ക് ഭയമില്ല. ഭയമുള്ളവർക്ക് പരിശീലകനാകാൻ കഴിയില്ല. എന്റെ സ്ഥാനമല്ല, ഫുൾഹാമിന്റെ സ്ഥാനമാണ് പ്രധാനം."