ലോറി ഡ്രൈവറുടെ മകൾ, ഇരട്ടസഹോദരിയുടെ തണൽ; ഉഷയുടെ റെക്കോർഡ് മറികടന്ന വിത്യയുടെ കഥ

കേന്ദ്രീകരിച്ചു.

2018-ൽ പട്യാല എൻഐഎസിലെ ദേശീയ ക്യാമ്പിലെത്തിയെങ്കിലും വഴി എളുപ്പമായിരുന്നില്ല. കോവിഡും അപ്പെൻഡിസൈറ്റിസ് ശസ്ത്രക്രിയയും ടോക്കിയോ ഒളിമ്പിക്സ് ട്രയൽസിനുള്ള തയ്യാറെടുപ്പുകൾ തകിടം മറിച്ചു. ഒടുവിൽ ക്യാമ്പ് വിട്ട് 2022-ൽ ചെന്നൈയിലേക്ക് മാറി നെഹ്‌പാൽ സിങ് റാത്തോറിനു കീഴിൽ സ്വന്തം നിലയിൽ പരിശീലനം തുടങ്ങി. ക്യാമ്പിന്റെ സൗകര്യങ്ങൾ ഇല്ലാതായതോടെ പരിശീലനത്തിനും ഭക്ഷണത്തിനും താമസത്തിനുമുള്ള ചെലവ് സ്വയം കണ്ടെത്തണമായിരുന്നു. ആ ഘട്ടത്തിൽ തുണയായത് ഇരട്ടസഹോദരി നിത്യയാണ്. 100 മീറ്റർ ഹർഡിൽസ് താരം കൂടിയായ നിത്യ, ആദായനികുതി വകുപ്പിലെ ജോലിയിൽ നിന്നുള്ള ശമ്പളം കൊണ്ട് സഹോദരിയുടെ പരിശീലനച്ചെലവ് വഹിച്ചു. പിന്നീട് വിത്യക്ക് ഇന്ത്യൻ റെയിൽവേയിൽ ജോലി ലഭിച്ചതോടെയാണ് ആ ഭാരം കുറഞ്ഞത്.

സ്വന്തം നിലയിലുള്ള ആ പരിശീലനമാണ് വിത്യയെ രാജ്യത്തെ മുൻനിര താരമാക്കിയത്. 2021-ൽ വാറങ്കലിൽ നടന്ന ദേശീയ ഓപ്പൺ ചാമ്പ്യൻഷിപ്പിൽ 400 മീറ്റർ, 400 മീറ്റർ ഹർഡിൽസ്, മിക്സഡ് റിലേ എന്നിവയിൽ സ്വർണം നേടിയാണ് അവൾ ശ്രദ്ധിക്കപ്പെട്ടത്. 2023 സെപ്റ്റംബറിൽ ചണ്ഡീഗഢിൽ ഉഷയുടെ റെക്കോർഡിനൊപ്പമെത്താൻ ഒരു സെക്കൻഡിന്റെ നൂറിലൊരംശം മാത്രം കുറവ്. ഒരു മാസത്തിനകം ഹാങ്ചൗവിൽ ആ സമയത്തിനൊപ്പമെത്തി. 2024-ൽ ബെംഗളൂരുവിലെ ദേശീയ ഓപ്പണിൽ 1985-ൽ തിരുവനന്തപുരത്ത് ഉഷ സ്ഥാപിച്ച 56.80 സെക്കൻഡിന്റെ മീറ്റ് റെക്കോർഡും വിത്യ തിരുത്തി. 57 സെക്കൻഡിൽ താഴെ ഓടിയാൽ അഞ്ചു ദിവസത്തെ അവധി എന്നായിരുന്നു അന്ന് പരിശീലകന്റെ വാഗ്ദാനം. 56.23 സെക്കൻഡിൽ ഓടിയെത്തിയ വിത്യ ആ അവധി മാതാപിതാക്കൾക്കൊപ്പം ചെലവഴിച്ചു. കൊച്ചിയിൽ നടന്ന ഫെഡറേഷൻ കപ്പിൽ 56.04 സെക്കൻഡിന്റെ മീറ്റ് റെക്കോർഡോടെ സ്വർണം നേടിയതും കേരളത്തിന്റെ മണ്ണിലാണ്.

റെക്കോർഡിനൊപ്പമെത്തിയ ശേഷമുള്ള മൂന്നു വർഷം വിത്യക്ക് സമ്മർദത്തിന്റെ കാലമായിരുന്നു. ഉഷയുടെ റെക്കോർഡിനൊപ്പമെത്തിയല്ലോ, എപ്പോഴാണ് തകർക്കുക എന്ന ചോദ്യമാണ് എവിടെ ചെന്നാലും കേട്ടിരുന്നതെന്ന് നഗോയയിൽ നിന്ന് മടങ്ങിയെത്തിയ ശേഷം തമിഴ്നാട് സർക്കാർ നൽകിയ സ്വീകരണത്തിൽ അവൾ പറഞ്ഞു. മനസ്സും അതേ ചോദ്യം ആവർത്തിച്ചുകൊണ്ടിരുന്നു. ഇപ്പോൾ ഉത്തരം കിട്ടി. മുമ്പ് ആരും തിരിച്ചറിയാതിരുന്ന വിത്യ രാംരാജിനെ ഇന്ന് പോകുന്നിടത്തെല്ലാം ആളുകൾ തിരിച്ചറിയുന്നു. തന്റെ നേട്ടം കണ്ട് കൂടുതൽ കുട്ടികൾ കായികരംഗത്തേക്ക് വരുമെന്നും അവർക്ക് സ്വയം വിശ്വാസമുണ്ടാകുമെന്നുമാണ് പ്രതീക്ഷയെന്നും അവൾ കൂട്ടിച്ചേർത്തു.

ഏതു മെഡലിനെക്കാളും താൻ അഭിമാനിക്കുന്ന ഒരു നിമിഷത്തെക്കുറിച്ച് വിത്യ പറഞ്ഞിട്ടുണ്ട്. 2023-ഓടെ ഇരുവർക്കും കുടുംബത്തെ പോറ്റാനുള്ള വരുമാനമായപ്പോൾ, ലോറി ഓടിക്കുന്നത് നിർത്താൻ അച്ഛനോട് ആവശ്യപ്പെടാനായത്. അമ്മയ്ക്ക് ജീവിതത്തിലെ ആദ്യ വിമാനയാത്രയ്ക്കുള്ള ടിക്കറ്റെടുത്തു കൊടുക്കാനായതും. ഇരുപത്തിയെട്ടാം വയസ്സിൽ, ഒരു റെക്കോർഡും മൂന്ന് ഏഷ്യൻ ഗെയിംസ് മെഡലുകളുമായി നിൽക്കുമ്പോൾ വിത്യയുടെ കഥ ഒരു കായികതാരത്തിന്റെ വിജയം മാത്രമല്ല; ഒരു കുടുംബം ഒന്നിച്ചു താണ്ടിയ ദൂരത്തിന്റേതു കൂടിയാണ്.