ലീഗ് കപ്പിൽ ആഴ്സണലിന് നാണക്കേട്; നാലാം ഡിവിഷൻ ക്ലബ്ബായ ഫ്ലീറ്റ്‍വുഡിനോട് തോറ്റ് പുറത്ത്

ഫ്ലീറ്റ്‍വുഡ്: ഇംഗ്ലീഷ് ഫുട്ബോളിൽ പിരമിഡിൽ ആഴ്സണലിന് 84 സ്ഥാനം താഴെയുള്ള ഫ്ലീറ്റ്‍വുഡ് ടൗൺ കാർബാവോ കപ്പിലെ ഏറ്റവും വലിയ അട്ടിമറികളിലൊന്നിലൂടെ ക്വാർട്ടർ ഫൈനലിൽ. നിശ്ചിത സമയത്ത് 1-1ന് സമനിലയിലായ മത്സരത്തിൽ പെനാൽറ്റി ഷൂട്ടൗട്ടിൽ 5-3നാണ് ലീഗ് ടൂ ക്ലബ് പ്രീമിയർ ലീഗ് ചാമ്പ്യന്മാരെ വീഴ്ത്തിയത്. ആഴ്സണലിന്റെ പഴയ തട്ടകത്തിന്റെ പേരുള്ള ഫ്ലീറ്റ്‍വുഡിന്റെ ഹൈബറി സ്റ്റേഡിയത്തിലായിരുന്നു മത്സരം. പ്രീമിയർ ലീഗ് ചാമ്പ്യന്മാർ നാലാം ഡിവിഷൻ ക്ലബ്ബിനോട് ലീഗ് കപ്പിൽ തോൽക്കുന്നത് ഇതാദ്യമാണ്. ഫ്ലീറ്റ്‍വുഡ് ടൂർണമെന്റിന്റെ ക്വാർട്ടറിലെത്തുന്നതും ആദ്യമായി.

21ആം മിനിറ്റിൽ ഫുൾഹാമിൽ നിന്ന് ലോൺ അടിസ്ഥാനത്തിൽ എത്തിയ ആരോൺ ലുപാലോ-ബിയാണ് ആതിഥേയരെ മുന്നിലെത്തിച്ചത്. ആഴ്സണലിനായി അരങ്ങേറ്റം കുറിച്ച ഗോളി ഇലാൻ മെസ്ലിയറെ കീഴടക്കിയായിരുന്നു ഗോൾ. ഇടവേളയ്ക്കു ശേഷം മാർട്ടിൻ ഒഡെഗാർഡിനെയും ബെൻ വൈറ്റിനെയും ഇറക്കിയ മിക്കേൽ ആർട്ടേത്തയുടെ സംഘത്തിനായി 50ആം മിനിറ്റിൽ വിക്ടർ ഗ്യോക്കറസ് സമനില ഗോൾ നേടി; സീസണിലെ സ്വീഡിഷ് താരത്തിന്റെ ആദ്യ ഗോൾ. പിന്നീട് എണ്ണമറ്റ അവസരങ്ങൾ കളഞ്ഞുകുളിച്ചതോടെ ആഴ്സണലിന് വിജയഗോൾ അകന്നുനിന്നു. 86ആം മിനിറ്റിൽ ഹാരിസൺ നീലിന്റെ കടുത്ത ടാക്കിളിനു പിന്നാലെ തിരിച്ചു ചവിട്ടിയ കൗമാരതാരം മാക്സ് ഡൗമാൻ ചുവപ്പുകാർഡ് കണ്ടതോടെ ആഴ്സണൽ പത്തുപേരായി ചുരുങ്ങി. അവസാന നിമിഷങ്ങളിൽ ബെൻ വൈറ്റിന്റെയും ഒഡെഗാർഡിന്റെയും ശ്രമങ്ങൾ ഗംഭീര സേവുകളിലൂടെ തടഞ്ഞ ഫ്ലീറ്റ്‍വുഡ് ഗോളി ജേ ലിഞ്ച് കളി ഷൂട്ടൗട്ടിലേക്ക് നീട്ടി.

ഷൂട്ടൗട്ടിലും ലിഞ്ച് തന്നെയായിരുന്നു ഹീറോ. ബ്രൂണോ ഗിമറാസിന്റെ കിക്ക് ലിഞ്ച് തടഞ്ഞു. അഞ്ചു കിക്കും ലക്ഷ്യത്തിലെത്തിച്ച ഫ്ലീറ്റ്‍വുഡിനായി കൗമാരക്കാരനായ ഡിഫൻഡർ കോണർ ഹോഹിയാണ് വിജയകിക്ക് വലയിലാക്കിയത്. തുടർന്ന് ആരാധകർ മൈതാനത്തേക്ക് ഇരച്ചുകയറി; ആഹ്ലാദത്തിനിടെ ഫ്ലീറ്റ്‍വുഡ് മാനേജർ മാറ്റ് ലോലർ കണ്ണീരണിഞ്ഞു. "ഇത് ആസ്വദിക്കൂ എന്ന് മാത്രമാണ് കളിക്കാരോട് പറഞ്ഞത്. യാഥാർഥ്യം ഓർമിപ്പിക്കുന്നവനാകാൻ ആഗ്രഹിച്ചില്ല, പക്ഷേ ശനിയാഴ്ച ലീഗ് മത്സരമുണ്ടല്ലോ," ലോലർ പറഞ്ഞു. ശനിയാഴ്ച ബ്രിസ്റ്റൽ റോവേഴ്സിനെതിരെയാണ് ഫ്ലീറ്റ്‍വുഡിന്റെ അടുത്ത മത്സരം.

"പ്രതിരോധം നിയന്ത്രിച്ച് എന്റെ ശബ്ദം പോയി," മത്സരശേഷം ലിഞ്ച് സ്കൈ സ്പോർട്സിനോട് പറഞ്ഞു. കഴിഞ്ഞ സീസണിൽ ഇതേ ടൂർണമെന്റിൽ ഗ്രിംസ്ബി ടൗൺ മാഞ്ചസ്റ്റർ യുണൈറ്റഡിനെ വീഴ്ത്തിയതാണ് ടീമിന് പ്രചോദനമായതെന്ന് ലിഞ്ച് പറഞ്ഞു. "ഫ്ലീറ്റ്‍വുഡിലെ സാധാരണ രാത്രി. കൊടുങ്കാറ്റ് പ്രതീക്ഷിച്ചിരുന്നു; മോശം കാലാവസ്ഥ ഞങ്ങൾക്ക് അനുകൂലമാകുമെന്ന് കരുതി. ക്ലബ്ബിനും നാടിനും ഇത് എല്ലാമാണ്," ലിഞ്ച് കൂട്ടിച്ചേർത്തു. കളിയിൽ പന്ത് കൈവശം വെച്ചിട്ടും അവസരങ്ങൾ ഗോളാക്കാനാകാത്തതാണ് തോൽവിക്ക് കാരണമെന്ന് ആർട്ടേത്ത പ്രതികരിച്ചു.

ആഴ്സണലിനെതിരായ മത്സരത്തിനു മുമ്പ് രണ്ട് കളിയിൽ ആറു ഗോൾ വഴങ്ങി തോറ്റ ടീമാണ് ഫ്ലീറ്റ്‍വുഡ്; ചെൽട്ടൻഹാമിനോട് 4-2നും എക്സിറ്ററിനോട് 2-1നും. 2024 ഏപ്രിൽ 20ന് ലീഗ് വണ്ണിൽ നിന്ന് ഫ്ലീറ്റ്‍വുഡിന്റെ തരംതാഴ്ത്തൽ ഉറപ്പായ അതേ ദിവസം വുൾവ്സിനെ തോൽപിച്ച് ആഴ്സണൽ പ്രീമിയർ ലീഗിൽ ഒന്നാമതെത്തിയിരുന്നു. രണ്ടര വർഷത്തിനിപ്പുറം ഇരു ടീമും നേർക്കുനേർ വന്നപ്പോൾ ജയം ഫ്ലീറ്റ്‍വുഡിന്. 2012-13ൽ ക്വാർട്ടറിൽ ബ്രാഡ്ഫോർഡ് സിറ്റിയോട് ഷൂട്ടൗട്ടിൽ തോറ്റ ശേഷം നാലാം ഡിവിഷൻ ടീമുകളോട് കളിച്ച എട്ടു മത്സരങ്ങളിലും ആഴ്സണൽ ജയിച്ചിരുന്നു. ബുധനാഴ്ച നടക്കുന്ന ചെൽസി-ലിവർപൂൾ മത്സരത്തിനു ശേഷമാണ് ക്വാർട്ടർ ഫൈനൽ നറുക്കെടുപ്പ്.

15 വർഷമായി ക്ലബ്ബിനെ പിന്തുടരുന്ന ആരാധകൻ ബെൻ ബിബിസി റേഡിയോ 5 ലൈവിനോട് പറഞ്ഞതിലുണ്ട് ഫ്ലീറ്റ്‍വുഡിന്റെ മനസ്സ്. "കഴിഞ്ഞ ആഴ്ച ചെൽട്ടൻഹാമിൽ അരമണിക്കൂറിനുള്ളിൽ 3-0ന് പിന്നിലായപ്പോൾ എന്തിനാണ് ഈ ടീമിനെ പിന്തുടരുന്നതെന്ന് സ്വയം ചോദിച്ചു. ഇത് ഫുട്ബോളിലെ മാത്രമല്ല, ജീവിതത്തിലെ ഏറ്റവും മികച്ച രാത്രിയാണ്. ചെറിയ ബജറ്റുള്ള ഞങ്ങളുടെ കൊച്ചു ക്ലബ്ബിന് ഇങ്ങനെയൊരു നിമിഷം അവിശ്വസനീയമാണ്," ബെൻ പറഞ്ഞു.