പതിമൂന്ന് മിനിറ്റിൽ നാലു ഗോൾ; ബെൽജിയത്തെ തകർത്ത് സിദാന്റെ ഫ്രാൻസ്

പാരിസ്: അവസാന പതിമൂന്ന് മിനിറ്റിൽ പിറന്ന നാലു ഗോളുകളിൽ ബെൽജിയത്തെ തകർത്ത് ഫ്രാൻസ് യുവേഫ നേഷൻസ് ലീഗ് ഗ്രൂപ്പ് എ1-ൽ ഒന്നാം സ്ഥാനം ഉറപ്പിച്ചു. തിങ്കളാഴ്ച സ്റ്റാഡ് ഡി ഫ്രാൻസിൽ നടന്ന മത്സരത്തിൽ ഒരു ഗോളിന് പിന്നിൽ നിന്ന ശേഷമായിരുന്നു ആതിഥേയരുടെ തിരിച്ചുവരവ്. പകരക്കാരായി ഇറങ്ങിയ മൂന്നു പേർ ചേർന്നാണ് നാലു ഗോളുകളും നേടിയത്. മൈക്കൽ ഒലീസെ ഇരട്ടഗോൾ നേടി. സിദാൻ ചുമതലയേറ്റ ശേഷം ഫ്രാൻസിന്റെ ആദ്യ ഹോം ജയമാണിത്. കഴിഞ്ഞയാഴ്ച ബ്രസൽസിൽ ബെൽജിയത്തെ 1-0ന് തോൽപ്പിച്ചിരുന്ന ഫ്രാൻസ്, നാലു കളികളിൽ മൂന്നു ജയവും ഒരു സമനിലയുമായി പത്തു പോയിന്റോടെ ക്വാർട്ടർ ഫൈനലിന് തൊട്ടടുത്തെത്തി.

കഴിഞ്ഞ മത്സരത്തിലെ ടീമിൽ പത്തു മാറ്റങ്ങളുമായാണ് സിദാൻ ടീമിനെ ഇറക്കിയത്. പരിക്കേറ്റ കിലിയൻ എംബാപ്പെയുടെ അഭാവത്തിൽ ഉസ്മാൻ ഡെംബലെയായിരുന്നു നായകൻ. മാഞ്ചസ്റ്റർ യുണൈറ്റഡ് പ്രതിരോധതാരം ലെനി യോറോയും ടുളൂസ് ഗോൾകീപ്പർ ഗിയോം റെസ്റ്റെസും ഫ്രഞ്ച് ജഴ്സിയിൽ അരങ്ങേറി. സസ്പെൻഷൻ കാരണം കെവിൻ ഡി ബ്രൂയ്നെയും യൂറി ടിലെമാൻസും ഇല്ലാതെയാണ് മാർക്ക് വാൻ ബോമലിന്റെ ബെൽജിയം ഇറങ്ങിയത്. പന്ത് കൈവശം വച്ച് ആക്രമിച്ചത് ഫ്രാൻസാണെങ്കിലും ആദ്യ ഗോൾ ബെൽജിയത്തിന്റേതായി. 35ആം മിനിറ്റിൽ റോമിയോ ലാവിയ നൽകിയ നീളൻ പാസുമായി ഓഫ്സൈഡ് കെണി പൊളിച്ചു കുതിച്ച ഡോഡി ലുക്കെബാക്കിയോ, അരങ്ങേറ്റക്കാരനായ ഗോൾകീപ്പർ റെസ്റ്റെസിനെ മറികടന്ന് പന്ത് വലയിലെത്തിച്ചു. അതിനു തൊട്ടുമുൻപ് എസ്റ്റെബാൻ ലെപോളിന് ലഭിച്ച സുവർണാവസരം പുറത്തേക്കു പോയിരുന്നു.

രണ്ടാം പകുതിയിലും ഫ്രാൻസിന്റെ ആക്രമണങ്ങൾ ബെൽജിയത്തിന്റെ പ്രതിരോധക്കോട്ടയിൽ തട്ടി നിന്നു. തൊട്ടടുത്തു നിന്ന് ലെപോൾ ഉതിർത്ത ഷോട്ടും തടയപ്പെട്ടു. ഒരു മണിക്കൂർ പിന്നിട്ടതോടെ സിദാൻ ഷെർക്കിയെയും ഒലീസെയെയും ഇറക്കി; 72ആം മിനിറ്റിൽ ഡുവെയും കളത്തിലെത്തി. അതോടെ കളിയുടെ ഗതി മാറി. 77ആം മിനിറ്റിൽ ഡുവെ ഫ്രാൻസിനെ ഒപ്പമെത്തിച്ചു. നാലു മിനിറ്റിനകം ഒലീസെ ഒരുക്കിയ അവസരത്തിൽ ഷെർക്കിയുടെ ഷോട്ട് ബെൽജിയം ഗോൾകീപ്പർ മാർട്ടൻ വാൻഡെവോർട്ടിന്റെ കാലിലും കൈയിലും തട്ടി വലയിലേക്ക് കയറി. തുടർന്ന് ഡുവെ ഒരുക്കിയ രണ്ട് അവസരങ്ങളിൽ നിന്ന് 88ആം മിനിറ്റിലും ഇഞ്ചുറി ടൈമിലും ഒലീസെ ഗോൾ നേടിയതോടെ ബെൽജിയത്തിന്റെ പതനം പൂർണമായി.

ഗോൾ നേടിയതിനൊപ്പം രണ്ടു ഗോളുകൾക്ക് വഴിയൊരുക്കിയ ഡുവെയായിരുന്നു മത്സരത്തിന്റെ ഗതി തിരിച്ചത്. ബെഞ്ചിലുള്ളവർ ഉന്നത നിലവാരമുള്ള താരങ്ങളായതിനാൽ അവർക്ക് കളി മാറ്റാനാകുമെന്ന് ഉറപ്പുണ്ടായിരുന്നുവെന്ന് മത്സരശേഷം സിദാൻ പ്രതികരിച്ചു. 45 വർഷത്തിനു ശേഷം ഫ്രാൻസിനെതിരെ ഒരു ഔദ്യോഗിക മത്സരത്തിൽ ജയിക്കാമെന്ന ബെൽജിയത്തിന്റെ പ്രതീക്ഷയാണ് അവസാന നിമിഷങ്ങളിൽ തകർന്നത്. നാലു കളികളിൽ ആറു പോയിന്റുമായി ബെൽജിയം ഗ്രൂപ്പിൽ മൂന്നാം സ്ഥാനത്താണ്.