ഛേത്രിയുടെ പരിചയമോ ഡൽഹിയുടെ ചോരത്തിളപ്പോ? കിക്കോഫിനു മുന്നേ ടീമുകളെ അറിയാം

ബെംഗളൂരു: ഇന്ത്യൻ സൂപ്പർ ലീഗിന്റെ 2026-27 സീസൺ ഒക്ടോബർ 10ന് തുടങ്ങുകയാണ്. 13 ക്ലബ്ബുകളാണ് ഇത്തവണ ലീഗിൽ. ഹോം ആൻഡ് എവേ രീതിയിലുള്ള ഒന്നാം ഘട്ടത്തിൽ 78 മത്സരങ്ങൾ; അത് 2027 ജനുവരി 17ന് അവസാനിക്കും. ആദ്യ ആറു സ്ഥാനക്കാർ പ്ലേഓഫിലേക്ക് കടക്കും. ഫിഫ ഇന്റർനാഷണൽ വിൻഡോ കാരണം നവംബർ 7 മുതൽ 20 വരെ ലീഗിന് ഇടവേളയുണ്ട്. 78 കളികളിൽ 53 എണ്ണവും വെള്ളി, ശനി, ഞായർ ദിവസങ്ങളിലാക്കിയതും ഇത്തവണത്തെ പ്രത്യേകതയാണ്. ഉദ്ഘാടന മത്സരത്തിൽ ശനിയാഴ്ച വൈകീട്ട് അഞ്ചിന് ശ്രീ കണ്ഠീരവ സ്റ്റേഡിയത്തിൽ ബെംഗളൂരു എഫ്സി സ്പോർട്ടിങ് ക്ലബ് ഡൽഹിയെ നേരിടും. ഫെബ്രുവരിയിൽ കഴിഞ്ഞ സീസണിൽ ഇതേ മൈതാനത്ത് ഇരുവരും ആദ്യമായി ഏറ്റുമുട്ടിയപ്പോൾ ജയം ബെംഗളൂരുവിനായിരുന്നു (2-0). ബെംഗളൂരു എഫ്സി 2013ൽ രൂപീകരിച്ച ക്ലബ് ഐ-ലീഗും ഐഎസ്എലും നേടിയ ചരിത്രമുള്ള ടീമാണ്. കഴിഞ്ഞ സീസണിൽ 13 കളികളിൽ ആറു ജയവും അഞ്ച് സമനിലയും രണ്ട് തോൽവിയുമായി 23 പോയിന്റോടെ നാലാം സ്ഥാനം. ചാമ്പ്യന്മാരായ ഈസ്റ്റ് ബംഗാളിനേക്കാൾ മൂന്ന് പോയിന്റ് മാത്രം പിന്നിൽ. രണ്ട് തോൽവികൾ മാത്രം വഴങ്ങിയ ടീമിനെ പിന്നോട്ടടിച്ചത് സമനിലകളാണ്. റയാൻ വില്യംസും ബ്രയാൻ സാഞ്ചസും നാലു ഗോളുകളുമായി ടീമിന്റെ ടോപ് സ്കോറർമാരായി. പരിശീലകരുടെ കാര്യത്തിൽ സ്ഥിരതയില്ലാത്ത സീസണായിരുന്നു അത്. 2025 നവംബറിൽ ജെറാർഡ് സരഗോസ പടിയിറങ്ങി, തുടർന്ന് ചുമതലയേറ്റ റെനെഡി സിംഗിനു പകരം 2026 മാർച്ചിൽ സ്പാനിഷുകാരൻ പെപ് മുഞോസ് എത്തി. പരിശീലകസംഘം സീസണിന്റെ പാതിയിൽ ചുമതലയേറ്റ മുഞോസിന് ഇതാദ്യമായി മുഴുവൻ പ്രീ-സീസൺ ലഭിച്ചു. ബെംഗളൂരുവിലും ബല്ലാരിയിലെ ഇൻസ്പയർ ഇൻസ്റ്റിറ്റ്യൂട്ട് ഓഫ് സ്പോർട്സിലുമായിരുന്നു തയ്യാറെടുപ്പ്. അവസാന രണ്ടു മാസം കൊണ്ടു തുടങ്ങിവെച്ച ഗെയിം മോഡൽ ഇത്തവണ പൂർണമാക്കുകയാണ് ലക്ഷ്യമെന്ന് അദ്ദേഹം വ്യക്തമാക്കിയിട്ടുണ്ട്. ഫെറാൻ ബോറാസും നിഷാദ് നാഗ്രാജുമാണ് സഹപരിശീലകർ. ഇടക്കാല പരിശീലകനായിരുന്ന റെനെഡി സിംഗ് റിസർവ് ടീമിന്റെ ചുമതലയിലേക്ക് മാറി. ഡാരൻ കാൽഡെയ്റയാണ് ഡയറക്ടർ ഓഫ് ഫുട്ബോൾ. സ്ക്വാഡ് ഗോളിൽ ഗുർപ്രീത് സിംഗ് സന്ധു തന്നെ. ലാൽതുആമ്മാവിയ റാൽട്ടെയും അഹീബം സൂരജ് സിംഗും പകരക്കാരായുണ്ട്. പ്രതിരോധത്തിൽ ഡച്ചുകാരൻ മെന്നോ കോക്കും പോർച്ചുഗീസുകാരൻ സാൻഡ്രോ എംബാലോയും ചിങ്ലെൻസന സിംഗിനൊപ്പം എത്തും. നിഖിൽ പൂജാരി, റോഷൻ സിംഗ്, ഹർഷ് പാലണ്ടെ, റിക്കി മീതെയ് എന്നിവരും പിൻനിരയിലുണ്ട്. മധ്യനിരയിൽ അർജന്റീനക്കാരൻ മാനുവൽ ഡി ഇരിയോണ്ടോ ആങ്കറാകും. സുരേഷ് സിംഗ്, ലാൽറെംത്ലുആംഗ ഫനായി, വിനീത് വെങ്കടേഷ്, സോഹം വാർഷ്ണേയ, ശിവൽഡോ സിംഗ് എന്നിവരാണ് കൂടെ. മുന്നേറ്റത്തിൽ മൊണ്ടിനെഗ്രൻ സ്ട്രൈക്കർ മിഹൈലോ പെരോവിച്ച്, സ്പാനിഷ് വിങ്ങർ ബോർജ മാർട്ടിനസ്, റയാൻ വില്യംസ്, മോണിറുൽ മോള്ള, സെർട്ടോ കോം എന്നിവർക്കൊപ്പം നായകൻ സുനിൽ ഛേത്രിയും. അഞ്ച് വിദേശതാരങ്ങളും പുതിയവരാണ്. രാഹുൽ ഭേകെ (മോഹൻ ബഗാൻ), നംഗ്യൽ ഭൂട്ടിയ (ചെന്നൈയിൻ), ലോൺ കാലാവധി തീർന്ന ബ്രയാൻ സാഞ്ചസ്, സിറോജിദ്ദീൻ കുസിയേവ്, മുഹമ്മദ് സലാ, ഹാലിചരൺ നസ്സാരി എന്നിവർ ക്ലബ് വിട്ടു. ശക്തി ഗുർപ്രീത്, ചിങ്ലെൻസന, നിഖിൽ പൂജാരി, ഛേത്രി എന്നിവരുടെ പരിചയസമ്പത്തുള്ള ഇന്ത്യൻ നടുവ്. ഓരോ സ്ഥാനത്തും രണ്ടു പേരെ വീതം ഒരുക്കിയെന്ന് മുഞോസ് പറയുന്നു. പിഎസ്വിയിൽ കളിച്ചുവളർന്ന കോക്കും എംബാലോയും ചേർന്നാൽ പ്രതിരോധത്തിന് ഉയരവും കരുത്തും കൂടും. സെറ്റ് പീസുകളിൽ ബോർജയുടെ മികവും ക്ലബ് എടുത്തുപറയുന്നു. ദൗർബല്യം വിദേശ നിര പൂർണമായും പുതിയതാണ്; ഒത്തിണക്കത്തിന് സമയം വേണ്ടിവരും. ഡി ഇരിയോണ്ടോ (33), കോക് (32), ബോർജ (32) എന്നിവർ പ്രായത്തിലും മുന്നിലാണ്; 42കാരനായ ഛേത്രിയെ ഇപ്പോഴും ആശ്രയിക്കേണ്ടിവരുന്നതും ആശങ്കയാണ്. ഇത്തവണ ഡുറാൻഡ് കപ്പിൽ കളിക്കാത്തതിനാൽ മത്സരപരിചയം കുറവാണ്. രാഹുൽ ഭേകെയുടെ അഭാവം പിൻനിരയിൽ അനുഭവപ്പെടാം. ശ്രദ്ധിക്കേണ്ടവർ ഇന്തോനേഷ്യൻ ക്ലബ് പെർസെബായയിൽ നിന്നെത്തിയ 29കാരൻ പെരോവിച്ചാണ് ഗോളടിയുടെ ഭാരം ഏറ്റെടുക്കേണ്ടത്. എത്ര വേഗം അദ്ദേഹം ഇണങ്ങുന്നു എന്നതാകും ബെംഗളൂരുവിന്റെ സീസൺ നിർണയിക്കുക. നായകൻ ഛേത്രി അവസാന നിമിഷങ്ങളിൽ കളി തിരിക്കാൻ ഇപ്പോഴും പ്രാപ്തനാണ്. കേരള സാന്നിധ്യം മലപ്പുറം ചുങ്കത്തറക്കാരൻ ആഷിഖ് കുരുണിയൻ ഇത്തവണയും ബെംഗളൂരു നിരയിലുണ്ട്. 2025ൽ ക്ലബ്ബിൽ തിരിച്ചെത്തിയ ആഷിഖ് കഴിഞ്ഞ സീസണിൽ 10 കളികളിൽ മൂന്നു ഗോളുകൾ നേടി. ഇടത് വിങ്ങിലും ആവശ്യമെങ്കിൽ ലെഫ്റ്റ് ബാക്കായും ഇറങ്ങാൻ കഴിയുന്ന ആഷിഖിന്റെ വേഗം മുഞോസിന് വലിയ ആയുധമാണ്. സാധ്യത ആദ്യ ആറിലെത്തി പ്ലേഓഫ് ഉറപ്പിക്കുകയാണ് യാഥാർഥ്യബോധമുള്ള ലക്ഷ്യം; വിദേശതാരങ്ങൾ വേഗം ഇണങ്ങിയാൽ ആദ്യ നാലിലേക്കും കണ്ണെറിയാം. ഒക്ടോബർ 10ന് വൈകീട്ട് 5ന് കണ്ഠീരവയിൽ സ്പോർട്ടിങ് ക്ലബ് ഡൽഹിക്കെതിരെയാണ് ആദ്യ കളി. ഒക്ടോബർ 17ന് വീണ്ടും സ്വന്തം തട്ടകത്തിൽ ചെന്നൈയിൻ എഫ്സിയെ നേരിടും. കേരള ബ്ലാസ്റ്റേഴ്സുമായുള്ള ദക്ഷിണേന്ത്യൻ പോരാട്ടം 2027 ജനുവരി 3ന് ബെംഗളൂരുവിൽ. സ്പോർട്ടിങ് ക്ലബ് ഡൽഹി ഹൈദരാബാദ് എഫ്സിയാണ് 2025 ഒക്ടോബറിൽ ഡൽഹിയിലേക്ക് താവളം മാറ്റി സ്പോർട്ടിങ് ക്ലബ് ഡൽഹിയായത്. പുതിയ പേരിലുള്ള ആദ്യ ഐഎസ്എൽ സീസൺ പക്ഷേ കയ്പേറിയതായിരുന്നു. 13 കളികളിൽ രണ്ടു ജയവും അഞ്ച് സമനിലയും ആറു തോൽവിയുമായി 11 പോയിന്റോടെ 12ാം സ്ഥാനം. 13 ഗോളുകൾ മാത്രമാണ് ടീം നേടിയത്. അഞ്ച് ഗോളുമായി മതിജ ബാബോവിച്ചായിരുന്നു ടോപ് സ്കോറർ; ഗോൾകീപ്പർ നോറ ഫെർണാണ്ടസ് നാലു ക്ലീൻ ഷീറ്റുകൾ സ്വന്തമാക്കി. പക്ഷേ, ഈ സീസണിന് മുമ്പ് ഡുറാൻഡ് കപ്പിൽ കണ്ടത് മറ്റൊരു ഡൽഹിയെയാണ്. ജംഷെഡ്പൂർ എഫ്സിയെ 2-1നും ഡിഫൻഡേഴ്സ് എഫ്സിയെ 7-0നും ഇന്ത്യൻ എയർഫോഴ്സിനെ 7-1നും ക്വാർട്ടറിൽ എഫ്സി റെംഗ്ദായിയെ 5-1നും തകർത്തു. സെമിയിൽ ഈസ്റ്റ് ബംഗാളിനെ ഗോളില്ലാതെ പിടിച്ചുനിർത്തിയ ശേഷം ഷൂട്ടൗട്ടിൽ 3-5ന് വീണു. പരിശീലകസംഘം 2025 ഒക്ടോബറിൽ ചുമതലയേറ്റ പോളണ്ടുകാരൻ തോമാസ് ട്ചോർസ് തന്നെയാണ് പരിശീലകൻ. പരിശീലക സ്ഥാനത്തുള്ള ഈ തുടർച്ചയാണ് ഡൽഹിയുടെ മൂലധനം. സ്ക്വാഡ് ഗോളിൽ നോറ ഫെർണാണ്ടസിനൊപ്പം വിശാൽ യാദവും കരൺജിത് സിംഗുമുണ്ട്; ഈ മാസം ഓയിൽ ഇന്ത്യ ഗോൾഡ് കപ്പിൽ വല കാത്തത് വിശാലും ഭബീന്ദ്രയുമാണ്. പ്രതിരോധത്തിൽ കൊളംബിയൻ ഡുവാൻ വിയാഫാരയും നൈജീരിയൻ ന്ഡുക ജൂനിയറും ആണ് പുതിയ മുഖങ്ങൾ; ക്ലബ് നായകൻ ലാംഗോലെൻ ഹാംഗ്ഷിങ്, അശുതോഷ് മഹത, മനോജ് മുഹമ്മദ്, ക്ലാരൻസ് ഫെർണാണ്ടസ്, യാംഗ്ലെം സനാതോംബ സിംഗ്, മുഹമ്മദ് കൈഫ് എന്നിവരും നിരയിലുണ്ട്. മധ്യനിരയിൽ ചെന്നൈയിൻ വിട്ടെത്തിയ ഇന്ത്യ അണ്ടർ 23 നായകൻ ലാൽറിൻലിയാന ഹ്നാംതെയാണ് ഏറ്റവും പ്രധാന സൈനിങ്; മൂന്നു വർഷത്തേക്കാണ് കരാർ. ബുറുണ്ടിക്കാരൻ ഡേവിഡ് റിച്ചാർഡ് ന്ദായിഷിമിയേ, കൊളംബിയൻ പ്ലേമേക്കർ ഹുവാൻ പെഞ്ഞ, മുഹമ്മദ് അസ്ഹർ, അഗസ്റ്റിൻ ലാൽറോചാന എന്നിവരും മധ്യനിരയിലുണ്ട്. മുന്നേറ്റത്തിൽ ബ്രസീലിയൻ സ്ട്രൈക്കർ റോഡ്രിഗീഞ്ഞോയും കേപ് വെർദെ ദേശീയ ടീമിൽ കളിച്ച കാർലോസ് ഫോർട്ടസും; കൂട്ടിന് മുഹമ്മദ് ഐമൻ, ജോസഫ് സണ്ണി, സൗരവ് കെ എന്നിവർ. ആറു വിദേശതാരങ്ങളും പുതിയവർ. യുവതാരം ഡയമണ്ട് സിംഗും ടീമിലെത്തി. ഇറെംഗ്ബം ന്യൂട്ടൻ, കാംഗോഹാവോ ഡൌംഗൽ, റിംഗ്സാംഗ്മി ലുംഗർവോ എന്നിവരെ ലോണിൽ വിട്ടു. കഴിഞ്ഞ സീസണിലെ നായകൻ അലക്സ് സജി മോഹൻ ബഗാനിലേക്ക് ചേകിയത് പ്രതിരോധത്തിന് വലിയ നഷ്ടമാണ്. ശക്തി ഡുറാൻഡ് കപ്പിൽ സെമിക്കു മുമ്പ് നാലു കളികളിൽ 21 ഗോളുകൾ. മത്സരപരിചയത്തോടെയാണ് ടീം ലീഗിലേക്കെത്തുന്നത്. ഈസ്റ്റ് ബംഗാളിനെതിരെ 90 മിനിറ്റും ഗോൾ വഴങ്ങാതെ നിന്ന പ്രതിരോധം ചിട്ടയുള്ളതാണെന്നും തെളിയിച്ചു. ഹ്നാംതെയും ന്ദായിഷിമിയും എത്തിയതോടെ മധ്യനിരയ്ക്ക് യുവത്വവും ഊർജവും കൂടി. ദൗർബല്യം‌ എല്ലാ വിദേശതാരങ്ങളും ഐഎസ്എലിൽ പരീക്ഷിക്കപ്പെടാത്തവരാണ്. കരുത്തരോട് ഏറ്റുമുട്ടിയ സെമിയിൽ ഓപ്പൺ പ്ലേയിൽ ഗോൾ വന്നില്ല. ഒന്നാം ഘട്ടത്തിലെ 12 കളികളിൽ എട്ടെണ്ണവും എവേ മൈതാനത്താണ്; അതിൽ ആദ്യ ആറു കളികളിൽ അഞ്ചും യാത്രയാണ്. കഴിഞ്ഞ സീസണിലെ ദുർബലമായ ഗോൾവേട്ടയും മനസ്സിലുണ്ടാകും. ശ്രദ്ധിക്കേണ്ടവർ ഡിഫൻഡേഴ്സിനെതിരെ ആദ്യ സ്റ്റാർട്ടിൽ തന്നെ അഞ്ചു ഗോളടിച്ച 25കാരൻ റോഡ്രിഗീഞ്ഞോയാണ് ഡൽഹിയുടെ തുറുപ്പചീട്ട്; ആദ്യ 13 മിനിറ്റിനുള്ളിൽ ഹാട്രിക് തികച്ചിരുന്നു അദ്ദേഹം. ജംഷെഡ്പൂർനെതിരെ അരങ്ങേറ്റത്തിൽ ഇരട്ടഗോൾ നേടിയ ഹ്നാംതെയും ശ്രദ്ധേയനാണ്. കേരള സാന്നിധ്യം കൊച്ചിയിലെ ഗോൾഡൻ ത്രെഡ്സിലൂടെ വളർന്ന മലയാളി ഫോർവേഡ് ജോസഫ് സണ്ണിയാണ് ഡൽഹിയിലെ കേരള മുഖം. ഡുറാൻഡ് ക്വാർട്ടറിൽ പകരക്കാരനായിറങ്ങി ഇരട്ടഗോളുമായി കളി തിരിച്ചത് അദ്ദേഹമാണ്. ഗോകുലം കേരളയ്ക്കൊപ്പം ഐ-ലീഗ് കിരീടം നേടിയ കണ്ണൂരുകാരൻ സൗരവ് കെയും ടീമിലുണ്ട്; ഈ മാസം ഓയിൽ ഇന്ത്യ ഗോൾഡ് കപ്പിൽ അദ്ദേഹം ആദ്യ ഇലവനിൽ ഇറങ്ങി. കേരള ബ്ലാസ്റ്റേഴ്സിലൂടെ വളർന്ന ലക്ഷദ്വീപ് സഹോദരങ്ങൾ മുഹമ്മദ് ഐമനും മുഹമ്മദ് അസ്ഹറും 2028 വരെ കരാർ നീട്ടി ടീമിൽ തുടരുന്നു. വയനാട്ടുകാരൻ അലക്സ് സജി മോഹൻ ബഗാനിലേക്ക് പോയപ്പോൾ, യുവ ഫോർവേഡ് അലൻ സജിയെ സൂപ്പർ ലീഗ് കേരളയിലെ ഫോർസ കൊച്ചിക്ക് ഡൽഹി ലോണിൽ നൽകി. സാധ്യത പട്ടികയുടെ താഴെത്തട്ടിൽ നിന്ന് കരകയറി മധ്യനിരയിലെത്തുകയാണ് യാഥാർഥ്യബോധമുള്ള ലക്ഷ്യം; ആദ്യ ആറ് വലിയ നേട്ടമാകും. ബെംഗളൂരുവിലെ ഉദ്ഘാടന മത്സരത്തിനു ശേഷം ഒക്ടോബർ 16ന് രാത്രി 7.30ന് ഡൽഹി ജവഹർലാൽ നെഹ്രു സ്റ്റേഡിയത്തിൽ മോഹൻ ബഗാൻ സൂപ്പർ ജയന്റ്സിനെതിരെ ആദ്യ ഹോം മത്സരം. ഡിസംബർ 10ന് രാത്രി 7.30ന് കൊച്ചിയിൽ കേരള ബ്ലാസ്റ്റേഴ്സിനെയും നേരിടും. ഉദ്ഘാടനപ്പോര്