400 റൺസ് പിന്തുടർന്ന് ജയിക്കുക എന്നത് ഒരിക്കലും എളുപ്പമല്ല: ശുഭ്മാൻ ഗിൽ

വെസ്റ്റ് ഇൻഡീസിനെതിരായ രണ്ടാം ഏകദിനത്തിലെ ചരിത്ര വിജയത്തിന് ശേഷം തന്റെ ബാറ്റിംഗ് തന്ത്രങ്ങളും മത്സരത്തിലെ വെല്ലുവിളികളും വെളിപ്പെടുത്തി ഇന്ത്യൻ ക്യാപ്റ്റനും പ്ലെയർ ഓഫ് ദി മാച്ചുമായി തിരഞ്ഞെടുക്കപ്പെട്ട ശുഭ്മാൻ ഗിൽ. 405 റൺസ് പിന്തുടർന്ന് പുറത്താകാതെ 223 റൺസ് അടിച്ചുകൂട്ടിയിട്ടും ക്രീസിൽ യാതൊരു ഭാവവ്യത്യാസവുമില്ലാതെ നിന്ന ഗിൽ, കളിക്ക് ശേഷം ശരീരമാസകലം മരവിപ്പും വേദനയുമാണെന്ന് തുറന്നുപറഞ്ഞു. "ഞാൻ വിയർത്തുപോലുമില്ലെന്ന് പുറത്തുനിന്ന് കാണുന്നവർക്ക് തോന്നാം, എന്നാൽ ഇപ്പോൾ എന്റെ ശരീരത്തിലെ എല്ലാ ഭാഗങ്ങളും കടുത്ത വേദനയിലാണ് (cramping). ഉച്ചയ്ക്ക് കടുത്ത ചൂടായിരുന്നു ഇവിടെ. വിൻഡീസ് താരങ്ങൾ ബാറ്റ് ചെയ്ത രീതി വെച്ച് നോക്കുമ്പോൾ, കേവലം 13 ഓവർ കഴിഞ്ഞപ്പോഴേക്കും ഞങ്ങൾ 20-25 ഓവർ ഫീൽഡ് ചെയ്ത ക്ഷീണം തോന്നിയിരുന്നു. ഇതൊരു മികച്ച മത്സരമായിരുന്നു." ​ഗിൽ പറഞ്ഞു. മത്സരത്തിന്റെ പകുതി ഘട്ടത്തിൽ സ്കോർ ബോർഡിൽ 400 റൺസ് കണ്ടപ്പോൾ ഞങ്ങൾക്ക് മേൽ വലിയ സമ്മർദ്ദമുണ്ടായിരുന്നു. പിച്ച് എത്രതന്നെ ബാറ്റിംഗിന് അനുകൂലമാണെങ്കിലും, ഗ്രൗണ്ട് എത്ര ചെറുതാണെങ്കിലും 400 റൺസ് പിന്തുടർന്ന് ജയിക്കുക എന്നത് ഒരിക്കലും എളുപ്പമല്ല. അതുകൊണ്ടുതന്നെ ഈ പ്രകടനത്തിൽ ഞാൻ അതീവ സന്തുഷ്ടനാണ്. അവസാനം വരെ ക്രീസിൽ തുടർന്ന് ടീമിനായി മത്സരം ജയിപ്പിക്കാൻ കഴിഞ്ഞതിൽ ഒരുപാട് സന്തോഷമുണ്ടെന്നും ഇന്ത്യൻ നായകൻ കൂട്ടിച്ചേർത്തു. വിൻഡീസ് ബൗളിംഗിനെ തച്ചുടച്ച തന്റെ തന്ത്രത്തെക്കുറിച്ച് ഗിൽ വ്യക്തമാക്കിയത് ഇങ്ങനെയാണ്. "കളിയെ ചെറിയ ചെറിയ ഭാഗങ്ങളായി തിരിച്ച് സമീപിക്കുക എന്നതായിരുന്നു എന്റെ രീതി. ആദ്യ പവർപ്ലേയിൽ വിക്കറ്റ് നഷ്ടപ്പെടുത്താതെ 75-80 റൺസ് നേടുക എന്നതായിരുന്നു ആദ്യ ലക്ഷ്യം. പുതിയ പന്തിൽ തുടക്കത്തിൽ ബൗളർമാർക്ക് ചെറിയ ആനുകൂല്യം ലഭിച്ചേക്കാം. എന്നാൽ പന്ത് പഴയതാകുന്നതോടെ പിച്ച് ബാറ്റിംഗിന് കൂടുതൽ അനുകൂലമാകുമെന്ന് ഞങ്ങൾക്കറിയാമായിരുന്നു. ഗ്രൗണ്ടിന്റെ ഒരു വശത്തെ ബൗണ്ടറി ലൈൻ വളരെ ചെറുതായിരുന്നു. ഫാസ്റ്റ് ബൗളർമാർ എത്തുമ്പോൾ ആ വശം ലക്ഷ്യമിട്ട് കളിക്കാൻ ഞങ്ങൾ തീരുമാനിച്ചു. 25 ഓവർ പിന്നിടുമ്പോൾ 200-210 റൺസ് ആയാൽ സുരക്ഷിതമായിരിക്കുമെന്നാണ് കരുതിയത്. എന്നാൽ ഞങ്ങൾ 230-240 റൺസോളം അപ്പോഴേക്കും നേടിയിരുന്നു. പവർപ്ലേയ്ക്ക് ശേഷം സമ്മർദ്ദം ഞങ്ങളിൽ നിന്നും വിൻഡീസ് നിരയിലേക്ക് മാറി. ഇന്നിംഗ്സിന്റെ പകുതി വരെ വിക്കറ്റുകൾ പോയില്ല എന്നതും വലിയ ബോണസായി." ബൗളർമാരുടെ തിരിച്ചുവരവ്