ലാമിൻ യമാലിന്റെയും റോഡ്രിയുടെയും മികവിൽ സ്പാനിഷ് പടയ്ക്ക് ജയം

സ്പെയിൻ: കാർലോസ് ടാർടിയേ സ്റ്റേഡിയത്തിൽ സ്വന്തം കാണികൾക്ക് മുന്നിൽ ചെക്കിയയെ തകർത്ത് ലോകചാമ്പ്യൻമാർ. കളിയിലുടനീളം തിളക്കമാർന്ന പ്രകടനമാണ് സ്പെയിൻ കാഴ്ചവെച്ചത്. ചെക്ക് റിപ്പബ്ലിക്കിനെതിരെ ഒന്നിനെതിരെ മൂന്ന് ഗോളുകൾക്കാണ് സ്പാനിഷ് സംഘത്തിന്റെ വിജയം. മത്സരത്തിന്റെ തുടക്കത്തിൽ തന്നെ മിന്നും ഫോമിലുള്ള യുവതാരം ലാമിൻ യമാൽ (6') സ്പെയിനിനെ മുന്നിലെത്തിച്ചു. തുടർന്ന് മത്സരത്തിന്റെ നിയന്ത്രണം ഏറ്റെടുത്ത സ്പെയിനായി സൂപ്പർ താരം റോഡ്രി (35') ലീഡ് ഇരട്ടിയാക്കി. രണ്ടാം പകുതിയിൽ ചെക്ക് റിപ്പബ്ലിക്കിനായി ജിറി സ്ലാമ (69') ഒരു ഗോൾ മടക്കി മത്സരത്തിലേക്ക് തിരിച്ചുവരാൻ ശ്രമിച്ചെങ്കിലും, കളി അവസാനിക്കുന്നതിന് തൊട്ടുമുമ്പ് (89') മൈകെൽ മെറിനോ നേടിയ ഗോളിലൂടെ സ്പെയിൻ വിജയം ഉറപ്പിച്ചു. ചെക്ക് പ്രതിരോധനിരയ്ക്ക് സ്പാനിഷ് മുന്നേറ്റങ്ങളെ തടയാൻ ഏറെ പണിപ്പെടേണ്ടി വന്നു. മത്സരത്തിന്റെ അവസാന ഘട്ടത്തിൽ ചെക്ക് താരം ലേഡിസ്ലോവ് ക്രെയ്ച്ചിക്ക് ചുവപ്പ് കാർഡ് ലഭിച്ചതും അവർക്ക് തിരിച്ചടിയായി.