അലാവെസിനെതിരെ ബാഴ്സയുടെ ആറാട്ട് ! എൽ ക്ലാസിക്കോ തോൽവിയുടെ ക്ഷീണം തീർത്തു

ബാഴ്‌സലോണ: പി.എസ്.ജിക്കും റയൽ മാഡ്രിഡിനും എതിരെ തുടർച്ചയായി തോറ്റതിന്റെ കേട് സ്വന്തം മൈതാനത്ത് ഗോൾമഴ പെയ്ത് ബാഴ്‌സലോണ തീർത്തു. ലാ ലീഗയിൽ അലാവെസിനെ ഒന്നിനെതിരെ ആറ് ഗോളുകൾക്കാണ് ഹാൻസി ഫ്ലിക്കിന്റെ സംഘം തകർത്തത്. ലാമിൻ യാമലും റാഫിന്ഹയും രണ്ട് ഗോൾ വീതം നേടി. ഒരു ഗോളും രണ്ട് അസിസ്റ്റുമായി ഫെർമിൻ ലോപ്പസ് കളിയുടെ താരമായി. ഇടവേളയ്ക്ക് മുമ്പേ ബാഴ്‌സ നാല് ഗോളിന് മുന്നിലെത്തിയിരുന്നു.

എട്ടാം മിനിറ്റിൽ ഫെർമിന്റെ പാസിൽ റാഫിന്ഹ ഗോൾവേട്ട തുടങ്ങി. ഒമ്പത് താരങ്ങൾ പങ്കാളികളായ 15 പാസുകളുടെ നീക്കമായിരുന്നു ആ ഗോൾ. 23ആം മിനിറ്റിൽ യാമലിന്റെ പാസിൽ ഇടുങ്ങിയ കോണിൽ നിന്ന് ഫെർമിൻ തന്നെ ലീഡ് ഇരട്ടിയാക്കി. 41ആം മിനിറ്റിൽ ഫെർമിൻ തട്ടിയെടുത്ത് നൽകിയ പന്ത് റാഫിന്ഹ വീണ്ടും വലയിലാക്കി. ആദ്യ പകുതിയുടെ ഇഞ്ച്വറി സമയത്ത് ബോക്സിന്റെ അതിർത്തിയിൽ നിന്ന് യാമലിന്റെ താഴ്ന്ന ഷോട്ട് വലയിൽ. 65ആം മിനിറ്റിൽ ഗോൾകീപ്പറുടെ തലയ്ക്കു മുകളിലൂടെ പന്ത് കോരിയിട്ട് യാമൽ രണ്ടാം ഗോളും നേടി. ആദ്യം ഓഫ്സൈഡ് വിളിച്ചെങ്കിലും വാർ പരിശോധനയിൽ ഗോൾ അനുവദിച്ചു. യാമലിന് പകരം ഇറങ്ങിയ ആന്റണി ഗോർഡൻ 81ആം മിനിറ്റിൽ ആറാം ഗോളും നേടി. 84ആം മിനിറ്റിൽ ബാഴ്‌സ പ്രതിരോധത്തിന്റെ പിഴവിൽ നിന്ന് മരിയാനോ ഡിയാസ് അലാവെസിന്റെ ആശ്വാസ ഗോൾ കണ്ടെത്തി.

ഇരട്ട ഗോളോടെ ലീഗിൽ 11 കളികളിൽ റാഫിന്ഹയുടെ ഗോൾനേട്ടം 15 ആയി. സീസണിലെ ആദ്യ പതിനൊന്ന് ലീഗ് കളികളിൽ 15 ഗോൾ എന്ന ക്ലബ്ബ് നേട്ടത്തിൽ മുൻ താരങ്ങളായ സീസർ റോഡ്രിഗസിനും ലയണൽ മെസ്സിക്കും ഒപ്പമെത്തി ബ്രസീൽ താരം. നാല് പ്രതിരോധ താരങ്ങളടക്കം ആറ് പേർ ഇല്ലാതെ ഇറങ്ങിയ ബാഴ്‌സയിൽ ഫ്രാങ്കി ഡി യോങ് സെൻട്രൽ ഡിഫൻസിൽ കളിച്ചു. യുവതാരം ബ്രയാൻ ഫാരിനാസ് റൈറ്റ് ബാക്കായി സീനിയർ ടീമിൽ അരങ്ങേറി. 11 കളികളിൽ 30 പോയിന്റുമായി ബാഴ്‌സ പട്ടികയിൽ ഒന്നാം സ്ഥാനത്ത് തുടരുന്നു.

ലെവാന്തെയെ 2-0ന് തോൽപ്പിച്ച അത്‌ലറ്റിക്കോ മാഡ്രിഡ് 28 പോയിന്റുമായി രണ്ടാം സ്ഥാനത്ത് തുടരുന്നു. അലെക്സ് ഗ്രിമാൽഡോ (36), ജിയോവാനി സിമിയോണി (62) എന്നിവരാണ് അത്‌ലറ്റിക്കോയ്ക്കായി ഗോൾ നേടിയത്. റയൽ ബെട്ടിസ് മാലഗയെ 2-1ന് തോൽപ്പിച്ചു. ഇസ്കോയുടെ പാസിൽ മാർക് ബാർത്രയും (38) പാബ്ലോ ഫോർണാൽസും (45+2) ബെട്ടിസിനായി ലക്ഷ്യം കണ്ടു. എ. നിന്യോ മാലഗയുടെ ഗോൾ നേടി. 23 പോയിന്റുമായി ബെട്ടിസ് നാലാം സ്ഥാനത്താണ്.

റായോ വായെകാനോ സെൽട്ടയെ 3-0ന് തകർത്തു. ഹോർഹെ ഡി ഫ്രൂട്ടോസ് രണ്ട് ഗോൾ (36, 55) നേടിയപ്പോൾ യു. ലോപ്പസ് (73) പട്ടിക തികച്ചു. വിയ്യറയലിനെ അവരുടെ തട്ടകത്തിൽ എസ്പാന്യോൾ 1-0ന് വീഴ്ത്തി. 60ആം മിനിറ്റിൽ എൽ. കാബ്രേരയാണ് വിജയ ഗോൾ നേടിയത്.

ഞായറാഴ്ച ഇന്ത്യൻ സമയം രാത്രി 8.45ന് റേസിങ് സാന്റാൻഡറിനെ നേരിടുന്ന റയൽ മാഡ്രിഡാണ് മൂന്നാം സ്ഥാനത്ത്. ഒരു കളി കുറവ് കളിച്ച റയലിന് 24 പോയിന്റാണുള്ളത്.