അവസാന ഇനത്തിൽ മലപ്പുറത്തിന് റെക്കോർഡ്; 14 വർഷം പഴക്കമുള്ള ഇടുക്കിയുടെ റിലേ റെക്കോർഡ് തകർന്നു

കോഴിക്കോട്: സംസ്ഥാന സ്കൂൾ കായികമേളയിലെ അത്‌ലറ്റിക്ക്സിന് റെക്കോർഡോടെ കൊടിയിറങ്ങി. അവസാന ഇനമായ സീനിയർ ആൺകുട്ടികളുടെ 4x400 മീറ്റർ റിലേയിൽ 3:17.91 സെക്കൻഡിൽ ഓടിയെത്തിയ മലപ്പുറം പുതിയ മീറ്റ് റെക്കോർഡിട്ടു. 2012ൽ ഇടുക്കി കുറിച്ച 3:19.81 എന്ന റെക്കോർഡാണ് 1.90 സെക്കൻഡിന് തിരുത്തിയത്. സെക്കൻഡിന്റെ ഒമ്പത് നൂറിലൊന്ന് മാത്രം പിന്നിൽ 3:18.00ൽ ഫിനിഷ് ചെയ്ത തൃശൂരും പഴയ റെക്കോർഡിനെ മറികടന്നു.

പാണ്ടല്ലൂർ എച്ച്.എസ്.എസിലെ ഇ.കെ. ഷഹ്മിൽ, ഒഴുകൂർ ക്രസന്റ് ഹൈസ്കൂളിലെ ഷസിൻ മുജീബ്, കടകശ്ശേരി ഐഡിയലിലെ അബ്ദുൽ ബാസിത്, എം.കെ. വിനായക്, കെ.സി. അമീൻ, കിഴുപറമ്പ ജി.വി.എച്ച്.എസ്.എസിലെ പി. മുഹമ്മദ് സഹൽ എന്നിവരാണ് മലപ്പുറം ടീമിൽ. 400 മീറ്റർ ഹർഡിൽസിൽ സ്വർണം നേടിയ അബ്ദുൽ ബാസിത് ഇതോടെ ഇരട്ട സ്വർണം തികച്ചു. 200, 400 മീറ്ററുകളിൽ സ്വർണം നേടിയ കുന്നംകുളം ബോയ്സിലെ കെ.ജെ. എബിൻ തൃശൂർ ടീമിൽ വെള്ളി നേടി. 800 മീറ്റർ ജേതാവ് എ. ശിവപ്രസാദും ജെറിൻ സി. ജോണും അടങ്ങിയ തിരുവനന്തപുരം 3:20.71ൽ വെങ്കലം നേടി.

സീനിയർ പെൺകുട്ടികളുടെ റിലേയിൽ ആലപ്പുഴ 3:59.89ൽ സ്വർണം നേടി. രണ്ടാം സ്ഥാനത്തെക്കാൾ ഏഴര സെക്കൻഡ് മുന്നിലായിരുന്നു ആലപ്പുഴ. 100 മീറ്റർ ഹർഡിൽസിൽ മീറ്റ് റെക്കോർഡിട്ട അനാമിക അജേഷും 200 മീറ്റർ ജേതാവ് ആർ. ശ്രേയയും അൽഫോൺസ ജോസഫ്, ആൻ ഫ്രാൻസിസ്ക, ബി. ശരയു ലക്ഷ്മി, പി.എൽ. ശിവനന്ദ എന്നിവരും ടീമിലുണ്ടായിരുന്നു. മൂന്ന് സ്വർണം നേടിയ നിവേദ്യ കലാധർ അടങ്ങിയ പാലക്കാട് (4:07.40) വെള്ളിയും മലപ്പുറം (4:11.47) വെങ്കലവും നേടി.

ജൂനിയർ പെൺകുട്ടികളുടെ റിലേയിൽ കണ്ണൂർ 3:58.36ൽ സ്വർണം നേടി. 400, 200 മീറ്ററുകളിൽ സ്വർണം നേടിയ ഇവാന ടോമിക്ക് ഇതോടെ മേളയിൽ മൂന്നാം സ്വർണം. ക്രോസ് കൺട്രിയിൽ വെങ്കലം നേടിയ എസ്. അഭിരാമി, ഏഞ്ചൽ ബിജു, എം.എം. വൈഗ, വി.എസ്. ശാന്തി മരിയ, പി. റിഷിഖ ജഗദീഷ് എന്നിവരാണ് ടീമിലെ മറ്റുള്ളവർ. പാലക്കാട് (4:03.75) വെള്ളിയും കോട്ടയം (4:06.35) വെങ്കലവും നേടി.

ജൂനിയർ ആൺകുട്ടികളുടെ റിലേയിൽ പാലക്കാട് 3:22.88ൽ സ്വർണം നേടി. കഴിഞ്ഞ വർഷം കോയൽമണ്ണം സി.എ.എച്ച്.എസ്. കുറിച്ച 3:22.53 എന്ന മീറ്റ് റെക്കോർഡിന് 0.35 സെക്കൻഡ് മാത്രം അകലെയാണ് പാലക്കാട് എത്തിയത്. എസ്. സോനിത്, കെ.എം. അശ്വിൻ, ആർ. അർജുൻ, കെ.എസ്. സമർജിത്, ഡി. അഭിന്ദേവ്, ജി.എസ്. ഗോവിന്ദ് എന്നിവരാണ് ടീമിൽ. മലപ്പുറം (3:23.45) വെള്ളിയും ആലപ്പുഴ (3:25.72) വെങ്കലവും നേടി.