പരിമിതികളെ തോൽപ്പിച്ച് കുട്ടികൾ; അത്‍ലറ്റിക്ക്സ് മത്സരങ്ങൾ നാളെ മുതൽ

കോഴിക്കോട്: സംസ്ഥാന സ്കൂൾ കായികമേളയുടെ രണ്ടാം ദിനം ഭിന്നശേഷി വിദ്യാർഥികളുടേതായിരുന്നു. പരിമിതികളെ കൂസാക്കാതെ ട്രാക്കിലും ഫീൽഡിലും ഇറങ്ങിയ രണ്ടായിരത്തോളം കുട്ടികൾ ഇൻക്ലൂസീവ് മത്സരങ്ങളെ വിസ്മയകരമാക്കി. ചാത്തമംഗലം എൻഐടിയിലായിരുന്നു മത്സരങ്ങൾ.

ഫുട്ബോൾ, വോളിബോൾ, ഖൊ-ഖൊ തുടങ്ങിയ ഗെയിംസ് ഇനങ്ങളുടെ പ്രാഥമിക റൗണ്ട് മത്സരങ്ങൾ സബ് ജൂനിയർ, ജൂനിയർ, സീനിയർ വിഭാഗങ്ങളിലായി നടന്നു. തിരുവനന്തപുരം, തൃശൂർ, കണ്ണൂർ ജില്ലകൾ മികച്ച പ്രകടനവുമായി കളം നിറഞ്ഞപ്പോൾ ആതിഥേയരായ കോഴിക്കോടും ഒപ്പത്തിനൊപ്പമുണ്ട്.

എന്നാൽ സംഘാടനത്തിലെ പാളിച്ചകൾ മത്സരങ്ങളുടെ ആദ്യദിനം തന്നെ മേളയുടെ നിറം കെടുത്തി. വിതരണം തുടങ്ങി രണ്ടു മണിക്കൂറിനകം ഉച്ചഭക്ഷണം തീർന്നു. രാവിലെ ആറു മണി മുതൽ ഗ്രൗണ്ടിലുണ്ടായിരുന്ന ഭിന്നശേഷി വിദ്യാർഥികളിൽ ചിലർക്ക് ഊണ് കിട്ടിയില്ല. 9,000 പേരെ പ്രതീക്ഷിച്ചിടത്ത് കൂടുതൽ പേർ എത്തിയതാണ് പ്രതിസന്ധിക്ക് കാരണമെന്നാണ് ഭക്ഷണക്കമ്മിറ്റിയുടെ വിശദീകരണം. ചോറ് തീർന്നപ്പോൾ പകരം ചപ്പാത്തി നൽകിയെന്നും ഒരു മണിക്കൂറിനകം പ്രശ്നം പരിഹരിച്ചെന്നും ഭക്ഷണക്കമ്മിറ്റി കൺവീനർ പറഞ്ഞു.

മേളയുടെ ഹൃദയമായ ജനറൽ അത്‍ലറ്റിക്ക്സ് മത്സരങ്ങൾ നാളെ തുടങ്ങും. അതിവേഗ താരങ്ങളെയും ദൂരമ്പോട്ടിലും ഉയരമ്പോട്ടിലും മികവുള്ളവരെയും കണ്ടെത്തുന്ന ട്രാക്ക് ആൻഡ് ഫീൽഡ് പോരാട്ടങ്ങൾ തുടങ്ങുന്നതോടെ മേളയുടെ ആവേശം ഇരട്ടിക്കും. മഴ മുന്നറിയിപ്പുണ്ടായിരുന്നെങ്കിലും കാലാവസ്ഥ അനുകൂലമായത് സംഘാടകർക്ക് വലിയ ആശ്വാസമാണ്.