പെനാൽറ്റി പാഴാക്കി ലൂണ; ചെന്നൈയിനെതിരെ ബ്ലാസ്റ്റേഴ്സിന് ഗോൾരഹിത സമനില

ചെന്നൈ: ഇന്ത്യൻ സൂപ്പർ ലീഗിലെ ദക്ഷിണേന്ത്യൻ ഡർബിയിൽ ചെന്നൈയിൻ എഫ്.സി.യും കേരള ബ്ലാസ്റ്റേഴ്സും ഗോൾരഹിത സമനിലയിൽ പിരിഞ്ഞു. 51ആം മിനിറ്റിൽ ലഭിച്ച പെനാൽറ്റി ക്യാപ്റ്റൻ അഡ്രിയാൻ ലൂണ പോസ്റ്റിലേക്ക് അടിച്ചതോടെയാണ് ചെന്നൈ മറീന അരീനയിൽ ബ്ലാസ്റ്റേഴ്സിന് ജയം നഷ്ടമായത്. ഇഞ്ച്വറി സമയത്ത് ഇരു ടീമുകളിലും ഒരോരുത്തർ ചുവപ്പുകാർഡ് കണ്ട് പുറത്തായതോടെ കളി അവസാനിച്ചത് പത്തുപേരുമായി.

ഇടവേള കഴിഞ്ഞ് അധികം വൈകാതെ ചെന്നൈയിൻ പ്രതിരോധ താരം ഇർഫാൻ യദ്വാഡ് ബോക്സിൽ പന്ത് കൈകൊണ്ട് തടഞ്ഞതിനാണ് പെനാൽറ്റി വിധിച്ചത്. എന്നാൽ ലൂണയുടെ വലതുകാലൻ ഷോട്ട് ഇടതു പോസ്റ്റിൽ തട്ടിത്തെറിച്ചു. തൊട്ടുമുമ്പ്, സുമിത് ശർമയുടെ പാസിൽ കോറൗ സിങ് തൊടുത്ത ഷോട്ടും ചെന്നൈയിൻ പ്രതിരോധം തടഞ്ഞിരുന്നു. ചെന്നൈയിനെതിരെ ഏഴ് കളികളിൽ മൂന്ന് ഗോളും ആറ് അസിസ്റ്റും നേടിയ ചരിത്രമുള്ള ലൂണയെ 83ആം മിനിറ്റിൽ പിൻവലിച്ച് മോമോ യാൻസാനെയെ ഇറക്കി.

ആദ്യ പകുതിയിൽ ആതിഥേയരുടെ ആധിപത്യമായിരുന്നു. ഇടവേള വരെ 61 ശതമാനം പന്ത് കൈവശം വെച്ച ചെന്നൈയിൻ എട്ട് കോർണറുകൾ നേടിയപ്പോൾ ബ്ലാസ്റ്റേഴ്സിന് ഒന്ന് മാത്രമാണ് ലഭിച്ചത്. രണ്ടാം പകുതിയിൽ ആശ്ലി വെസ്റ്റ്വുഡിന്റെ സംഘം കളിയിലേക്ക് തിരിച്ചുവന്നു. മലയാളി താരം വിബിൻ മോഹനനെ 77ആം മിനിറ്റിൽ കോറൗ സിങ്ങിന് പകരം ഇറക്കി.

അവസാന നിമിഷങ്ങളിൽ കളി ചൂടുപിടിച്ചു. 88ആം മിനിറ്റിൽ മഞ്ഞക്കാർഡ് കിട്ടിയ ചെന്നൈയിന്റെ ഇമ്മാനുവൽ ഇമാനിഷിമ്‌വെയ്ക്ക് ഇഞ്ച്വറി സമയത്ത് തര്ക്കത്തിന് രണ്ടാം മഞ്ഞക്കാർഡും ചുവപ്പുകാർഡും ലഭിച്ചു. അതേ സമയത്ത് അക്രമാസക്തമായ പെരുമാറ്റത്തിന് ബ്ലാസ്റ്റേഴ്സിന്റെ എ. ഗ്രീനിന് നേരിട്ട് ചുവപ്പുകാർഡ് കിട്ടി. ഇതോടെ അടുത്ത കളിയിൽ ഗ്രീനിന് ഇറങ്ങാനാവില്ല.

നോർത്ത്ഈസ്റ്റ് യുണൈറ്റഡിനോട് 4-1ന് തോറ്റും മുംബൈ സിറ്റിയോട് ഗോൾരഹിത സമനില വഴങ്ങിയും എത്തിയ ബ്ലാസ്റ്റേഴ്സിന് തുടർച്ചയായ രണ്ടാം കളിയിലും ഗോൾ നേടാനായില്ല. ക്ലിഫോർഡ് മിരാൻഡയുടെ ചെന്നൈയിൻ സീസണിലെ ആദ്യ ജയത്തിനായുള്ള കാത്തിരിപ്പ് തുടരുകയാണ്