ദീർഘദൂരത്തിൽ പാലക്കാടൻ കുതിപ്പ്; ഡിസ്കസിൽ സോനയുടെ ആധിപത്യം

കോഴിക്കോട്: ചാത്തമംഗലം എൻഐടിയിലെ സിന്തറ്റിക് ട്രാക്കിൽ അത്‍ലറ്റിക്ക്സ് പോരാട്ടങ്ങൾക്ക് തുടക്കമായപ്പോൾ ദീർഘദൂര ഓട്ടത്തിൽ പതിവുപോലെ പാലക്കാടിന്റെ ആധിപത്യം. ചൊവ്വാഴ്ച രാവിലെ നടന്ന അഞ്ച് ഫൈനലുകളിൽ മൂന്നിലും പാലക്കാടൻ താരങ്ങൾ സ്വർണമണിഞ്ഞു. ജൂനിയർ പെൺകുട്ടികളുടെ 3000 മീറ്ററിൽ സ്വർണവും വെള്ളിയും വെങ്കലവും പാലക്കാടിനാണ്. പുതുപ്പരിയാരം സി.ബി.കെ.എം ഗവ. എച്ച്.എസ്.എസിലെ ലയനകൃഷ്ണ ആർ. 10 മിനിറ്റ് 43.08 സെക്കൻഡിൽ ഓടിയെത്തി സ്വർണം നേടി. മുണ്ടൂർ എച്ച്.എസിലെ അർച്ചന എസ്. (10:50.83) വെള്ളിയും പറളി എച്ച്.എസിലെ എനിയ എം. (11:02.52) വെങ്കലവും നേടി.

സീനിയർ പെൺകുട്ടികളുടെ 3000 മീറ്ററിൽ പനങ്ങാട്ടിരി ആർ.പി.എം. എച്ച്.എസിലെ അക്ഷയ ജി. 10:58.64ൽ ഓടിയെത്തി സ്വർണം നേടി. എറണാകുളത്തിന്റെ മേരി സാന്ദ്ര എ.ബി. (സലേം ഹൈസ്കൂൾ വെസ്റ്റ് വെങ്ങോല, 11:11.57) വെള്ളിയും പറളിയുടെ ശ്രിയ സി.എസ്. (11:19.66) വെങ്കലവും നേടി. ജൂനിയർ ആൺകുട്ടികളുടെ 3000 മീറ്ററിൽ പറളി എച്ച്.എസിലെ അരോമൽ കെ.എസ്. 9:11.77ൽ ഫിനിഷ് ചെയ്ത് പാലക്കാടിന് മൂന്നാം സ്വർണം സമ്മാനിച്ചു. അരീക്കോട് എസ്.ഒ.എച്ച്.എസിലെ ആദിത്യൻ സൈനു (മലപ്പുറം, 9:13.18) വെള്ളിയും കോതമംഗലം മാർ ബേസിലിലെ റോഷൻ കെ. (എറണാകുളം, 9:15.31) വെങ്കലവും നേടി. ഒരു സ്വർണവും രണ്ട് വെങ്കലവുമായി പറളി എച്ച്.എസ് ആദ്യ ദിനം തന്നെ ശ്രദ്ധ നേടി.

സീനിയർ ആൺകുട്ടികളുടെ 3000 മീറ്ററിൽ പാലക്കാടിനെ മലപ്പുറം മറികടന്നു. കല്ലിങ്ങൽപറമ്പ് എം.എസ്.എം. എച്ച്.എസ്.എസിലെ വൈഷ്ണവ് പി. 9:02.35ൽ സ്വർണത്തിലേക്കോടി. ചിറ്റൂർ ഗവ. എച്ച്.എസ്.എസിലെ അരുൾ സി.വി. (പാലക്കാട്, 9:05.84) വെള്ളിയും കടകശ്ശേരി ഐഡിയൽ ഇ.എച്ച്.എസ്.എസിലെ അമീൻ കെ.സി. (മലപ്പുറം, 9:06.92) വെങ്കലവും നേടി. സീനിയർ പെൺകുട്ടികളുടെ ഡിസ്കസ് ത്രോയിൽ കാസർകോടിന്റെ സോന മോഹൻ ടി. എതിരാളികളെ ഏറെ പിന്നിലാക്കി. കുട്ടമത്ത് ഗവ. എച്ച്.എസ്.എസിലെ സോന 41.63 മീറ്റർ എറിഞ്ഞപ്പോൾ വെള്ളി നേടിയ മൂക്കുതല പി.സി.എൻ.ജി. എച്ച്.എസ്.എസിലെ തുഷാര ടി.വി.ക്ക് (മലപ്പുറം) 33.36 മീറ്ററിലെത്താനേ കഴിഞ്ഞുള്ളൂ; എട്ട് മീറ്ററിലേറെ വ്യത്യാസം. കാവനൂർ സി.എച്ച്.എം.കെ.എം. എച്ച്.എസിലെ ദിയ കൃഷ്ണ ഇ.കെ. (28.19) വെങ്കലം നേടി.

ജൂനിയർ ആൺകുട്ടികളുടെ ഡിസ്കസ് ത്രോയിൽ ആലത്തിയൂർ കെ.എച്ച്.എം. എച്ച്.എസിലെ മുഹമ്മദ് ഫഹദ് വി. 42.35 മീറ്റർ എറിഞ്ഞ് മലപ്പുറത്തിന് സ്വർണം സമ്മാനിച്ചു. സോനയുടെ സ്കൂളായ കുട്ടമത്ത് ഗവ. എച്ച്.എസ്.എസിലെ ഋതുഭേദ് എ.വി. 41.13 മീറ്ററുമായി വെള്ളി നേടിയതോടെ ഡിസ്കസിൽ കുട്ടമത്തിന് ഇരട്ടിത്തിളക്കം. മേലൂർ സെന്റ് ജോസഫ്സ് എച്ച്.എസിലെ ജെസിൻ ജോഷി (തൃശൂർ, 37.25) വെങ്കലം നേടി

രാവിലെ നടന്ന ഈ അഞ്ച് ഫൈനലുകളിൽ നിന്ന് മൂന്ന് സ്വർണവും രണ്ട് വെള്ളിയും രണ്ട് വെങ്കലവുമാണ് പാലക്കാടിന്. ഒരു സ്വർണവും രണ്ട് വെള്ളിയും രണ്ട് വെങ്കലവുമായി മലപ്പുറം തൊട്ടുപിന്നിലുണ്ട്. കാസർകോട് ഒരു സ്വർണവും എറണാകുളം ഒരു വെള്ളിയും ഒരു വെങ്കലവും നേടി.